Qazaqstanda 20 myńǵa jýyq kalıanhananyń qyzmeti zańdastyrylýy múmkin

ASTANA. KAZINFORM — Memlekettik kirister komıteti Aktsızderdi ákimshilendirý basqarmasynyń basshysy Abylaı Mekebaev Qazaqstanda kalıanhanalardyń qyzmetine qaıta ruqsat berilýi múmkin ekenin málim etti.

— Salynǵan tyıym óz fýnktsııasyn atqarmaı otyr. Normatıvtik aktiniń retteýshi yqpalyn taldaý aıasynda balama joldar qarastyrylǵan. Balama jol dep otyrǵanymyz — tyıymdy sol kúıinde saqtap, ákimshilik jaýapkershilikti qatańdatý nemese jańa retteý quralyn engizý. Taldaý tyıymdy saqtaý nemese kúsheıtý kóleńkeli segment pen sybaılas jemqorlyq táýekelin arttyratynyn kórsetti. Aktiniń retteýshi yqpalyn baǵalaý esepterine súıensek, retteýdiń jańa tásilin iske asyrý 20 myńdaı mekemeniń jumysyn zańdastyryp, 250 myńdaı adamnyń jumys ornyn saqtaýǵa nemese zańdastyrýǵa múmkindik beredi. Sondaı-aq bıýdjetke 23 mlrd teńgedeı túsim ákeledi. Bul — alymdar, fıskaldandyrýdan túsetin aqsha men jyl saıyn alynatyn tólemder, — dedi ol normatıvke usynylyp otyrǵan ózgeristerdi jarııa talqylaýǵa arnalǵan onlaın jıynda.

Onyń sózinshe, jańa tásil kalıan qyzmetin kórsetý salasyndaǵy zań buzý faktilerin azaıtyp, epıdemıologııalyq jáne qaýipsizdikti arttyrýǵa jol ashady.

— AQSh, Germanııa, Birikken Arab Ámirlikteri, Ózbekstan sııaqty elderdiń tájirıbesi kalıan qyzmetin usynatyn uıymdardyń qyzmetin retteýde tyıym salýdan góri zańdastyrý modeli tıimdi ekenin kórsetip otyr. Osylaısha aktiniń retteýshi yqpalyn baǵalaý qorytyndysy usynylyp otyrǵan ózgerister atalǵan segmentti kóleńkeden shyǵaryp, halyqtyń densaýlyǵyna tıgizetin keri áserin azaıtýǵa baǵyttalǵanyn kórsetedi, — dedi Abylaı Mekebaev.

Buǵan deıin Qazaqstanda kalıanǵa qatysty shekteýlerdi jeńildetý múmkindigi talqylanyp jatqanyn jazǵan edik.