Qazaqstanda 20-ǵa jýyq memlekettik muraǵat ǵımaratyn salý qajet – mınıstr

ASTANA. QazAqparat – Elimizde 20-ǵa jýyq memlekettik muraǵat ǵımaratyn salý qajettiligi bar. Bul týraly Mádenıet jáne sport mınıstrliginiń keńeıtilgen alqa otyrysynda vedomstvo basshysy Ashat Oralov aıtty, dep habarlaıdy QazAqparat tilshisi.

«Muraǵat salasyndaǵy ózekti másele – búkil el boıynsha muraǵat qoımalarynyń tolǵany. Máselen, búgingi tańda 500 myń birlikti saqtaýǵa arnalǵan 20-ǵa jýyq memlekettik muraǵat ǵımaratyn salý qajettiligi bar. Árıne, bul bastama vedomstvoaralyq jumys pen úılestirýdi talap etetini sózsiz. Bıylǵy jyly negizgi mindet – Indýstrııa jáne ınfraqurylymdyq damý mınıstrligimen ózara is-qımyl jasaı otyryp, jobalaý-smetalyq qujattamany ázirleý», - dedi Ashat Oralov.

Eske sala keteıik, ótken jyly tarıhı qujattardy túgendeý maqsatynda mamandar shet elderden Qazaqstanǵa 7 myńnan astam qujatty ákeldi.

Búgingi alqa májiliste Ashat Oralov, sondaı-aq bıyl jas qalamgerlerdi qoldaý maqsatynda arnaıy Prezıdenttik ádebı syılyǵy taǵaıyndalatynyn aıtty.