Qazaqstanda 20 000 teńgelik banknot aınalysqa shyǵarylady
«Bul banknot 2013 jyly daıyndalǵan. Basqa aqsha belgilerimen qatar, aınalysqa shyqqan kezeńnen bastap ol zańdy tólem quraly bolyp tabylady jáne tólemder men aqsha aýdarymdarynyń barlyq túrlerinde qabyldanýǵa mindetti», - delingen habarlamada. Banknottardyń dızaıny aınalystaǵy aqsha belgilerimen biryńǵaı stılde oryndalǵan: bet jaǵynyń basym beıneleri tiginen, al syrt jaǵynda kóldeneń ornalasqan. Banknottyń basym túsi kók-sur. Bet jaǵynda negizgi beıneler «Qazaq Eli» monýmenti, pyraq jáne «Máńgilik el» saltanatty arkasy beınelengen. Banknottyń joǵarǵy sol jaǵynda pyraq beınelengen, ol túrkitildes jáne kóshpendi halyqtardy qosa alǵanda, kóptegen mádenıette taza nur men ómirdiń, shabyt pen jemisti eńbektiń, maqsatqa umtylýshylyq pen bıliktiń nyshany retinde qabyldanady. Banknottyń tómengi jaǵynda ortada «Máńgilik el» saltanatty arkasy erkin eldiń máńgilik ıdeıasy, jalpyǵa ortaq Qazaqstan úıiniń ulttyq ıdeıasy sáýlet qurylysy turǵysynan beınelengen. Syrt jaǵynda banknottyń ortasyndaǵy negizgi beıne Qazaqstan kartasynyń pishini jáne astanamyz Astana qalasynyń Qazaqstan Respýblıkasynyń Konstıtýtsııasynda negizi qalanǵan bılik tarmaqtaryn bólý qaǵıdatyn kórsetetin tártippen ornalasqan Aqorda, Parlament jáne Úkimet ǵımarattary bar kórinisi beınelengen. Jańa banknot Qazaqstan teńgesiniń eń qorǵalǵan aqsha belgisi, sondaı-aq álemdegi eń qorǵalǵan banknottardyń biri bolyp tabylady. Qorǵaý úshin qoldan jasaýdan qorǵaý ındýstrııasyndaǵy sońǵy ınnovatsııalar, jalǵan aqsha jasaýshylarǵa qarsy is-qımyldyń jańartylǵan ári kúsheıtilgen klassıkalyq tásilderi paıdalanyldy. Bet jaǵyndaǵy negizgi qorǵanysh elementteri: banknottyń eki jaǵynan jaryqqa tosyp qaraǵanda kórinetin samuryq mıftik qusy túrindegi kompozıttik jetildirilgen sýtamǵy belgisi jáne móldir oryn túrindegi qus pishini. Dızaınynyń túpnusqalylyǵyn tekserýdi jeńildetetin tús aýystyrý elementteri pyraq, móldir orynda kórinetin qazaqtyń oıý-órnegi jáne tús aýystyratyn qorǵanysh úzik-úzik jip túrinde ornalasqan. Kózi nashar kóretin adamdar úshin banknottyń oń jaǵynda shetinde saýsaqpen ajyratýǵa bolatyn jeti joǵary bederli úshburysh basylǵan. Banknottyń syrt jaǵynda birqatar qorǵanysh elementi bar: sýtamǵy belgisi, tús aýystyrý boıaýmen basylǵan oıý-órnek elementi bar móldir oryn, jaryqqa tosyp qaraǵan kezde bet jaǵyndaǵy bóliktermen birtutas sýretti quraıtyn qosarlanǵan beıneniń bólikteri. Banknottyń tómengi sol jaq buryshyndaǵy nomınaly da kólbeý buryshyn ózgertken kezde túsin aýystyrady. Aıta ketelik, 2006 jylǵy úlgidegi nomınaly 2000, 5000, 10000 teńge banknottardyń birtindep aınalystan shyǵarý merzimderi uzartyldy. Kórsetilgen merzimge deıin bul banknottar zańdy tólem quraly bolyp tabylady jáne tólemder men banktik operatsııalar úshin Qazaqstan Respýblıkasynyń barlyq aýmaqtarynda qandaı da bir shekteýsiz qoldanylady. Sodan soń 12 aı ishinde - 2016 jylǵy 4 qazannan 2017 jylǵy 3 qazanǵa (qosa alǵanda) deıin - kórsetilgen aqsha belgileri kez kelgen ekinshi deńgeıdegi bankte aıyrbastalýǵa tıis. Bul merzimnen keıin barlyq qalǵan 2006 jylǵy úlgidegi nomınaly 2000, 5000 jáne 10000 teńge banknottar 2020 jylǵy 3 qazanǵa deıin barlyq QR Ulttyq bank fılıaldarynda aıyrbastalýǵa qabyldanatyn bolady. 2020 jylǵy 4 qazannan bastap banknottar zańdy emes bolyp tabylady. Joǵaryda kórsetilgen banknottardyń aıyrbastalýy tegin, komıssııa alýsyz ne aıyrbastaý úshin aqysyz júzege asyrylatyn bolady.
