Qazaqstanda 2 myńnan astam abonent uıaly baılanys operatoryn aýystyrdy
ASTANA. QazAqparat - QR Investıtsııalar jáne damý mınıstrligi Baılanys, aqparattandyrý jáne aqparat komıtetiniń málimetine sáıkes, 2016 jyldyń 5 men 8 qańtary aralyǵynda eki myńnan astam qazaqstandyq uıaly baılanys operatoryn aýystyrǵan, dep habarlaıdy QR Premer-mınıstriniń saıty.
«Esterińizge salsaq, 1 qańtardan bastap Qazaqstanda aqparattandyrý máseleleri boıynsha zańnamaǵa túzetýler, atap aıtqanda abonentterge uıaly baılanys operatoryn óz nómirin saqtaı otyryp tańdaýǵa múmkindik beretin abonenttik nómirlerdi kóshirý qyzmetin iske qosý (MNP) kúshine endi», delingen habarlamada.
Osylaısha, QR IDM beıindi komıteti jarııalaǵan statıstıkalyq málimetterge sáıkes aǵymdaǵy jyldyń 5 men 8 qańtary aralyǵynda burynǵy operatordyń qyzmetinen 2290 qazaqstandyq bas tartty.
Oǵan qosa, abonentterdiń qosylýy boıynsha kóshbasshylardyń arasynda «Altel» (982 adam), ekinshi orynda «Tele2» (558 adam), úshinshi orynda - «Beeline» (407 adam), tórtinshi orynda - «Kcell» (343 adam). Atalǵan kezeńde abonentter eń kóp bas tartqan operator «Kcell» (1218 adam) bolyp otyr.
«Operatordy aýystyrý úshin abonentke jańa operatormen kelisim-shart jasasyp, tarıftik jospardy tańdap jáne jańa SIM-karta alsa jetkilikti. Qabyldaıtyn operator burynǵy operatorǵa ótinim jiberip, 5 saǵattyń ishinde abonenttiń nómiri basqa operatordyń jelisine kóshiriledi. Abonentter úshin MNP qyzmeti tegin», delingen habarlamada.
