Qazaqstanda 2 myńǵa jýyq adam doktorantýraǵa túsýge ótinish bergen

NUR-SULTAN. QazAqparat - Ótinish qabyldaý 5 shilde men 5 tamyz aralyǵynda júrgizildi. Oqýǵa túsý úshin bir ǵana joǵary oqý ornyn jáne bir bilim baǵdarlamasyn tańdaýǵa bolady. Emtıhandar 20 tamyzǵa deıin jalǵasady. Doktorantýraǵa grantqa jáne aqyly negizde oqýǵa túsý shegi – 75 ball, dep habarlaıdy QazAqparat.

Ótken jyldan bastap doktorantýraǵa túsý emtıhany elektrondy formatta ótkizilip keledi.

Úmitkerler kompıýterde esse jazady, doktorantýrada oqýǵa daıyndyq boıynsha test jáne bilim baǵdarlamasynyń beıini boıynsha emtıhan tapsyrady.

«Túsý emtıhandarynyń birinshi kezeńi joǵary oqý oryndarynda suhbattasý formatynda júrgiziledi. Ekinshi kezeńi testileý ortalyqtary bazasynda elektrondyq formatta ótedi. Bolashaq doktoranttar joǵary oqý oryndary bekitetin taqyryptar boıynsha esse jazady. Esseni baǵalaý, doktorantýrada oqýǵa daıyndyq testi jáne beıindi emtıhandardyń nátıjeleri arqyly alynǵan baldar jınaqtalyp, qabyldaý emtıhanynyń qorytyndy baǵasy shyǵarylady», – dep atap ótti mınıstrliktiń joǵary jáne joǵary oqý ornynan keıingi bilim departamentiniń dırektory Gúljan Jarasova.

Jalpy, oqýǵa túsý emtıhanynyń eń joǵary kórsetkishi - 100 ball.

Onyń ishinde suhbattasý – 20, esse – 10 ball, doktorantýrada oqýǵa daıyndyǵyn anyqtaýǵa arnalǵan test – 30, beıindi emtıhan suraqtary – 40 ball.

Bıyl alǵash ret doktorantýraǵa túsý úshin shet tilin meńgergeni týraly sertıfıkattan bólek QAZTEST júıesi boıynsha memlekettik tildi meńgergenin rastaıtyn sertıfıkat usyný qajet.

Doktorantýra boıynsha memlekettik bilim tapsyrysyna keletin bolsaq, 2022-2023 oqý jylyna PhD mamandaryn daıarlaýǵa arnalǵan memlekettik grant sany – 1890.

Doktorantýraǵa «magıstr» dárejesi jáne keminde toǵyz aı jumys ótili bar nemese medıtsınalyq mamandyq boıynsha rezıdentýrada oqýyn aıaqtaǵan tulǵalar qabyldanady.

Foto: 1technation.com