Qazaqstanda 2 myń adam jumys kezinde jaraqat alady - Baqytjan Ábdiraıymov
«Qazaqstanda jyl saıyn eki myńǵa jýyq adam jumys barysynda múgedek bolyp qalady, eki júzden astam adam jazataıym mert bolady. Biz Kásipodaqtar federatsııasy retinde eńbekti qorǵaý jáne qaýipsizdik máselelerine tózbeýshilik tanytýǵa shaqyramyz. Óndiristik jaraqatqa qatysty kez kelgen oqys oqıǵa kásipodaqtan bastap, jumys berýshiler, prokýratýra jáne ózge de organdar úshin basty máselege aınalýy tıis», - dedi Kásipodaqtar federatsııasynyń tóraǵasy Baqytjan Ábdiraıymov Astanadaǵy Lokomotıv qurastyrý zaýytynyń qyzmetkerlerimen kezdesýde. 
Onyń aıtýynsha, Lokomotıv qurastyrý zaýytyn ózge kásiporyndarǵa úlgi etip kórsetýge bolady. Zaýyt ashylǵan sátten beri munda birde-bir jazataıym oqıǵa bolmaǵan. Sońǵy eki jylda kásiporynda eńbek qaýipsizdigi jáne qorǵaý boıynsha óndiristik keńes jumys isteıdi. Óndiristik keńester 2016 jyly jańa Eńbek kodeksinde bekitilgen.
«Óndiristik keńes eńbekti qorǵaý jáne eńbek qaýipsizdigi máselelerimen aınalysady. Bul tájirıbeni ózge de kásiporyndarda damytqymyz keledi. Ókinishke qaraı, mundaı óndiristik keńester barlyq kásiporyndarda júzege aspaıdy. Onyń túrli sebepteri bar. Jaqynda eńbekti qorǵaý boıynsha qoǵamdyq ınspektorlardyń forýmyn ótkizýdi josparlap otyrmyz», - dep óz sózin tolyqtyrdy B. Ábdiraıymov.
QR Kásipodaqtar federatsııasy keltirgen derekterge sáıkes, Qazaqstanda 12 myń óndiristik keńes bolsa, onyń 581-i ǵana naqty sektor kásiporyndarynda jumys isteıdi. 2018 jyldyń 1 aqpanyndaǵy málimet boıynsha, respýblıkada 230 myńnan astam kásipodaq bar.
