Qazaqstanda 2 mln adam aýanyń lastaný deńgeıi joǵary óńirlerde turyp jatyr
ASTANA. QazAqparat - Qazaqstanda jyl saıyn atmosferaǵa túrli statsıonarlyq kózderden 2,5 mln tonnadaı, bir ǵana kólikterdiń ózinen 1 tonnadan asatyn zııandy zattar, ıaǵnı ýly zattar shyǵarylady.
Osy máselege baılanysty senator Rashıt Ákimov óziniń depýtattyq saýalyn Úkimet basshysyna joldady, dep habarlaıdy «QazAqparat» HAA tilshisi.
«Sońǵy ýaqytta aýanyń lastanýy máselesi dúnıe júzin alańdatyp otyr. Bizdiń memlekette de aýanyń lastanýy kúrdeli jaǵdaıda. Elimizde ónerkásip, ózge de óńdeý kásiporyndary, JES pen kólik túrleriniń túri artqan saıyn olardyń aýa qabatyna shyǵaratyn ýly gazdary kóbeıýde. Mysaly, statıstıkalyq málimetterge súıensek, Qazaqstanda jyl saıyn atmosferaǵa túrli statsıonarlyq kózderden 2,5 mln tonnadaı, bir ǵana kólikterdiń ózinen 1 tonnadan asatyn zııandy zattar, ıaǵnı ýly zattar shyǵarylady eken. «Qazgıdromettiń» málimetinshe, 2017 jyly elimizdiń iri qalalarynda atmosferalyq aýanyń joǵary lastanýynyń 990, al asa qaýipti lastanýdyń 98 oqıǵalary tirkelipti», - deıdi ol.
Senatordyń aıtýynsha, bir ǵana Atyraýdyń ózinde aýa qabatynyń joǵary lastanýynyń 357 oqıǵasy jáne óte joǵary lastanýdyń - 75, Óskemende joǵary lastanýdyń - 419 jáne óte joǵary lastanýdyń 18 oqıǵasy tirkelgen.
«BUU Damý baǵdarlamasy sarapshylary jarııalaǵan málimetke sáıkes, qazir bizdiń elimizde halyqtyń 5 mıllıony, ıaǵnı 30 paıyzy atmosferalyq aýasy lastanǵan, al 2 mıllıon turǵyny aýanyń lastaný deńgeıi óte joǵary óńirlerde ómir súrýde. Bıylǵy qysta Temirtaý qalasy men qala aýmaǵynda qara qardyń jaýǵany úlken qoǵamdyq pikir týǵyzdy. Keıin bul da atmosferalyq aýanyń lastanýy bolyp shyqqany anyqtaldy. Al Almaty qalasynyń atmosferalyq aýa basseıniniń sapasy búgingi kúnniń óte kúrdeli máselesine aınalyp otyr. Búgin de Astana da aýanyń lastanýy jaǵynan ındeksi joǵary shaharlardyń qataryn tolyqtyryp otyr», - deıdi Ákimov.
Senator osy máselelerdi eskere otyryp, ekologııalyq jaǵdaıdy retke keltirýge, aýa qabatynyń lastanýyn joǵary deńgeıde boldyrmaý úshin Úkimet tarapynan júıeli sharalar qabyldaný kerektigin atady.
«Qorshaǵan ortanyń tazalyǵyn saqtaýdy eskere otyryp, eldi mekenderdegi atmoferalyq aýanyń lastaný máselelerin zertteý men taldaý úshin sarapshylardy, ǵalymdardy qosa otyryp, vedomstvoaralyq komıssııa qurý múmkindigin suraımyz», - dep túıdi Rashıt Ákimov.
