Qazaqstanda 2 mıllıonnan astam adam taza sýǵa jarymaı otyr
ASTANA. QazAqparat - Qazaqstanda 2 mıllıonnan astam adam taza sýǵa jarymaı otyr, degenmen halyqtyń 87 paıyzdan astamy taza aýyz sýmen qamtamasyz etilgen.
Bul týraly búgin QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov aıtty, dep habarlaıdy QazAqparat.
Halyqty aýyz sýmen qamtamasyz etý máselesiniń mańyzdylyǵyna sáıkes bul taqyryp Úkimettiń, jergilikti bıliktiń kún tártibinen túsken emes. 2002 jyly «Aýyz sý» baǵdarlamasy qabyldanyp, 2010 jylǵa deıin iske asyryldy. Nátıjesinde 3 417 aýyldyq eldi mekenderdi nemese 3,9 mln halyqty aýyz sýmen qamtamasyz etýge jaǵdaı jasalyndy. Tasymaldy sýdy paıdalanatyn turǵyndardyń sany 445 myń adamnan 123 myń adamǵa nemese 3,5 ese azaıdy. 2011 jyly «Aq bulaq» baǵdarlamasy qabyldandy, al 2015 jyldan bastap «2020 jylǵa deıin óńirlerdi damytý» baǵdarlamasynyń aıasynda Aýyz sý jobasy iske asyrylýda», - dedi mınıstr elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý barysynda.
Onyń dereginshe, sońǵy 15 jylda atqarylǵan jumystyń qorytyndysy boıynsha ústimizdegi jyldyń qyrkúıek aıyna aýyldy eldi mekenderdegi halyqtyń 80,3 paıyzy nemese 6,2 mln adam, qala turǵyndarynyń 92,9 paıyzy nemese 9,5 mln adam, jalpy respýblıka halqynyń 87,5 paıyzy nemese 15,7 mln adam aýyz sýmen qamtylyp otyr.
«Sý kodeksine» sáıkes Aýyl sharýashylyǵy mınıstrligi eldi mekenderge deıin toptyq sý qubyrlaryn salýdy jáne jańartýdy, al Investıtsııa jáne damý mınıstrligi eldi mekenderdiń ishinde jelilerdi salýdy jáne jańartýdy júrgizetindigi belgili. Osyǵan sáıkes, qazirgi kezde mınıstrlikke qaraıtyn «Qazsýshar» respýblıkalyq kásipornynyń teńgeriminde jalpy uzyndyǵy 10 myń shaqyrymnan asa 30 toptyq sý qubyry bar. Bul 497 aýyldy eldi mekenderdi jáne ol jerdegi 1 mıllıonnan asa halyqty qamtyp otyr. Onyń ishinde 156 aýyldyq eldi mekenderge tutynýshyǵa deıin «Qazsýshar» qyzmet kórsetedi, al qalǵan 341 eldi mekenderge ákimdikterdiń kommýnaldyq kásiporyndary qyzmet kórsetedi», - dedi Asqar Myrzahmetov.
Mınıstrdiń aıtýynsha, «Aq bulaq» jáne «Óńirlerdi damytý» baǵdarlamalary aıasynda, ıaǵnı 2011-2016 jyldary toptyq sý qubyrlaryn salý jáne jańartýǵa 59 mlrd teńge qarajat bólingen. Nátıjesinde 45 nysan paıdalanýǵa berildi.
«Aǵymdaǵy jyly toptyq sý qubyrlary boıynsha 17 jobaǵa 12 mlrd teńge bólindi. Onyń ishinde 7 joba aıaqtalatyn bolady, al qalǵandary josparǵa sáıkes kelesi jylǵa ótpeli. Nátıjesinde 50 aýyldyq eldi mekenderdegi 77 myń halyqty sýmen jabdyqtaý jaqsartylady», - dedi ol.
