Qazaqstanda 2,7 mln adam áli de úı telefonyn qoldanady

ASTANA. QazAqparat - Ulttyq statıstıka bıýrosy elimizde jyldan jylǵa tirkelgen telefon jelileriniń sany azaıyp kele jatqanyn málimdedi, dep habarlaıdy QazAqparat.

«2023 jylǵy qańtar-shildede Qazaqstanda tirkelgen telefon jelileriniń sany 2,7 mln birlikti qurady, bul 2022 jylǵy tıisti kezeńge qaraǵanda 6,4% az. Onyń ishinde 2,1 mln qoldanýshy – halyq, qalǵany – kásiporyndar», - dep jazdy mekemeden.

Byltyr tirkelgen telefon jelileriniń eń kóp sany Almatyda bolǵan – 466,6 myń birlik, bir jyl ishinde kórsetkish 23 myńǵa azaıdy. Budan ári Astana – 226,7 myń abonent, bir jylda 20 myń jeli aǵytylyp tastaldy. Abonentter sany boıynsha alǵashqy úshtikte Qaraǵandy oblysy –220,8 myń birlik, bir jyl ishinde 49,3 myń jelige azaıdy.

Aıta ketý kerek, 5 jyl ishinde telefon jelileriniń sany 11,6% azaıdy. Eger 2018 jyly jeliler sany 3,2 mln birlikti qurasa, 2022 jyly olardyń sany 2,8 mln boldy.