Qazaqstanda 2 600-den asa buqaralyq aqparat quraldary oıdaǵydaı damyp keledi

ASTANA. Tamyzdyń 27-si. QazAqparat - Qazaqstanda 2 600-den asa buqaralyq aqparat quraldary oıdaǵydaı damyp keledi. Bul týraly Astanada, juma kúni ótken Qazaqstan Respýblıkasy Konstıtýtsııasynyń 15 jyldyǵyna arnalǵan «Konstıtýtsııa - memlekettiń demokratııalyq damýynyń negizi» atty halyqaralyq ǵylymı-tájirıbelik konferentsııanyń ashylýynda Elbasy Nursultan Nazarbaev málim etti.

Memleket basshysy atap ótkendeı, bizdiń gazetter men jurnaldarymyz 11 tilde jaryq kóredi, teatrlarda aǵylshyn, ázirbaıjan, nemis, káris, ýkraın, uıǵyr, ózbek, dúngen, tatar tilderin qosa alǵanda alty til boıynsha qoıylymdar qoıylady.

«Olardyń barlyǵy tolyqtaı memleket tarapynan qarjylandyrylady. Mundaı tájirıbe álemniń bir de bir elinde joq. Bul memlekettiń óz erkimen atqaryp otyrǵan jumysy. Kópultty halyqqa degen, onyń tili, dini men mádenı qajettilikterine degen qamqorlyq», - dedi N.Nazarbaev.

Sonymen qatar, QR Prezıdenti Parlamenttiń 9 depýtaty delegatsııalyq etetin Qazaqstan halqy Assambleıasynyń mańyzdy konstıtýtsııalyq organ bolyp tabylatyndyǵyn atap ótti.

«Bul tilder men mádenıetti jandandyrý, qazaqstandyq patrıotızmge tárbıeleý, ultaralyq kelisimdi nyǵaıtý boıynsha atqarylyp jatqan úlken de kópjaqty jumys. Bul eki júzden astam etnıkalyq mektep, 195 jeksenbilik til ortalyǵy. Konstıtýtsııada bekitilgen memlekettiń zaıyrly minezi - qoǵamdaǵy toleranttylyqty nyǵaıtý úshin jasalatyn mańyzdy shart», - dep óz sózin aıaqtady Elbasy.