Qazaqstanda 2,5 mln adam tegin dári alady
«Ambýlatorııalyq dárilik qamtamasyz etý - bul tegin medıtsınalyq kómektiń kepildik berilgen kólemi aıasynda dıspanserlik esepte turǵan patsıentter úshin tegin dárilermen qamtamasyz etý bolyp tabylady. Tegin dári-dármekter tek qana dárigerlerdiń retseptimen taratylady. Bul retsepterdiń barlyǵy dári-dármekpen qamtamasyz etýdiń aqparattyq júıesinde tirkeledi. Qazirgi kúnde 49 aýrý boıynsha 400-den astam túrli dáriler 2,5 mln patsıentke tegin beriledi», - dedi ol.
Mınıstrdiń aıtýynsha, tegin jáne jeńildikpen beriletin dárilermen qamtamasyz etý júıesi elimizde 2005 jyly iske qosylǵan. Baǵdarlama jergilikti jáne respýblıkalyq bıýdjet esebinen qarjylandyrylady. 2005 jyly atalǵan júıege 2,8 mlrd teńge bólinse, bıylǵy jyly 130 mlrd teńgege jetip otyr. Atalǵan qarjynyń 36 mlrd teńgesi vaktsınalarǵa, al 94 mlrd teńgesi tikeleı retsept boıynsha dári-dármekterge jumsalady.
«Ambýlatorııalyq dárilik qamtamasyz etý júıesi elimizdegi eń mańyzdy, jıi kezdesetin áleýmettik aýrýlarǵa jumsalady. Birinshi orynda qant dıabetine qarsy dáriler tur. Oǵan 2016 jyly 8,8 mlrd teńge baǵyttaldy. Ekinshi orynda arterııalyq gıpertenzııany emdeýge arnalǵan dáriler, úshinshi orynda onkolgııalyq jáne qan aýrýlary ornalasqan. Jalpy qazirgi ýaqytta biz osy júıeni zerttep jatyrmyz. Kóp jaǵdaıda qarjyny jıi kezdesetin aýrýlarǵa jumsaımyz. Biraq keıde óte sırek kezdesetin qan aýrýlaryna da kóp aqsha ketedi. Máselen, 585 aýrýǵa 6 mlrd teńge qarjy jumsalyp otyr», - dedi Birtanov.