Qazaqstanda 2,3 mln adam elektrondyq saýda jasaıdy
NUR-SULTAN. QazAqparat - 2018 jyly Qazaqstannyń onlaın-saýda naryǵynyń kólemi 269 mlrd teńgeni qurady. Bul týraly búgin Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.
«2018 jyldyń qorytyndysy boıynsha onlaın-saýda naryǵynyń kólemi 1,5 esege ósti jáne 269 mlrd teńgeni qurady. Elektrondyq saýdanyń úlesi 2,9 paıyzǵa teń. Elektrondyq saýdadaǵy belsendi satyp alýshylardyń sany 2 esege artyp, 2,3 mln adamdy qurady», - dedi mınıstr.
Onyń dereginshe, qazaqstandyq elektrondyq saýda naryǵynda 1700-den astam derbes ınternet-dúken jumys isteıdi. Onyń úshten biri - 509-y, salyq jeńildikterin alýdy qalaýshylar bolyp sanalady. Elimizde 1 mln-nan astam ShOB sýbektilerine óz taýarlaryn satýǵa múmkindik beretin 20-ǵa jýyq elektrondyq saýda alańdary qyzmet etedi.
«Qazaqstandaǵy elektrondyq kommertsııa naryǵy qurylymynyń 68 paıyzyn taýarlar saýdasy qurasa, 32 paıyzyn kórsetiletin qyzmetter quraıdy. Taýarlardyń ishinde - qurylys materıaldary, turmystyq tehnıka, kosmetıka, kıim jáne aıaq kıim úlken suranysqa ıe. Kórsetiletin qyzmetterdiń ishinde - áýe jáne temirjol bıletterin satý, mádenı is-sharalar men kommýnaldyq qyzmetter úshin aqy tóleý», - dedi ol.
