Qazaqstanda 1 mln adam ózin úıge muqtaj retinde tirkegen
ASTANA. KAZINFORM — Elimizde turǵyn úıge suranys áli de joǵary. Qazir el boıynsha 1 mıllıonǵa jýyq azamat ózin turǵyn úıge muqtaj retinde tirkegen. Bul týraly BIZDIÑ ORTA podkastynda «Otbasy bank» AQ basqarma tóraǵasynyń orynbasary Jansultan Mataı aıtty.
— Jalpy búgingi tańda 1 mıllıonǵa jýyq adam ózin úıge muqtaj retinde tirkegen. Onyń ishinde jańa júıede shamamen 360 myń adam kezekte tur. Olar ózderiniń jáne otbasy músheleriniń atynda turǵyn úı joq ekenin rastap, málimetterin jańartty, — dedi Jansultan Mataı.
Onyń aıtýynsha, elimizde turǵyn úıge degen joǵary suranys birneshe faktormen baılanysty. Sonyń biri — turǵyn úımen qamtylý deńgeıiniń halyqaralyq standarttan tómen bolýy.
— BUU standarttaryna sáıkes ár adamǵa 30 sharshy metr turǵyn úıden kelýi kerek. Bizde bul kórsetkish búginde 25 sharshy metr. Sonymen qatar 2000-2002 jyldary dúnıege kelgen jastar qazir oqýyn aıaqtap, jeke baspana alýǵa umtylyp jatyr. Jyl saıyn elimizde 300-400 myń bala dúnıege keledi. Sondyqtan turǵyn úıge suranys áli de joǵary, — dedi ol.
Spıkerdiń sózinshe, turǵyn úıge muqtaj azamattardyń biryńǵaı bazasy iske qosylǵannan keıin kezekti ózektendirý jumystary jalǵasyp jatyr. Qazirgi júıede kezekke tek ózderiniń jáne otbasy músheleriniń atynda turǵyn úıi joq azamattar ǵana tirkele alady.
Sonymen qatar ol burynǵy turǵyn úı kezeginde turǵandardyń barlyǵy birdeı shyn máninde baspanaǵa muqtaj bolmaýy múmkin ekenin aıtty. Onyń pikirinshe, buryn qalyptasqan tizimdegi azamattardyń bir bóligi turǵyn úı satyp alǵanyna qaramastan, derekter ýaqytyly jańartylmaǵandyqtan kezekte qalyp qoıǵan. Sondyqtan qazirgi tańda turǵyn úı kezegi ınventarızatsııadan ótkizilip, talaptarǵa sáıkes kelmeıtin azamattar kezeń-kezeńimen tizimnen shyǵarylyp jatyr.
Aıta keteıik, buǵan deıin, BQO-da áleýmettik osal toptaǵy 19 myńnan astam adam turǵyn úı kezeginde turǵanyn habarlaǵan edik.
