Qazaqstanda 194 myń adam onkologııalyq aýrýlarmen aýyrady
«2021 jyldyń qorytyndysy boıynsha, onkologııalyq aýrýlarmen syrqattaný 9,8%-ǵa ósip, 100 myń turǵynǵa shaqqanda 190,3-ti qurady. ıAǵnı, 2021 jyly 36 myńnan astam jańa jaǵdaı anyqtaldy, bul 2020 jylmen salystyrǵanda 4 myńǵa artyq. Muny 2020 jyly Covid-19 jaǵdaıyna baılanysty turǵyndardyń emhanaǵa bara almaýymen baılanystyrýǵa bolady. 2021 jyly emhanaǵa barǵan turǵyndardyń sany kóp, skrınıngten ótken turǵyndar sany kóp», - dedi Qazaq onkologııa jáne radıologııa ǵylymı-zertteý ınstıtýtynyń basshysy, QR Densaýlyq saqtaý mınıstrliginiń shtattan tys bas onkology Dılıara Qaıdarova Ortalyq kommýnıkatsııalar qyzmetinde ótken baspasóz konferentsııasynda.
Onyń aıtýynsha, Qazaqstanda 194 myń naýqas esepte tur.
QR DSM medıtsınalyq kómekti uıymdastyrý departamenti dırektorynyń orynbasary Gúlnar Janǵarashevanyń aıtýynsha, onkologııalyq aýrýlarmen aýyratyndardyń negizgi úlesin (59%) eńbekke qabiletti jastaǵy adamdar quraıdy.
«Onkologııalyq aýrýlardy erte anyqtaý 27%-ǵa deıin ósti. Aýrý boıynsha birinshi orynda sút bezi obyry, ekinshi orynda – ókpe obyry, úshinshi orynda – kolorektaldy qaterli isik, tórtinshi orynda – asqazan obyry, besinshi orynda – jatyr moıny obyry tur. Bizde ólim-jitim 4,7%-ǵa tómendedi jáne bıyl 13 665 jaǵdaıdy qurady. Ólim-jitim qurylymynda birinshi orynda ókpe obyry, ekinshi orynda – asqazan obyry, úshinshi orynda – kolorektaldy qaterli isik, tórtinshi orynda – sút bezi obyry tur», - dep tolyqtyrdy D.Qaıdarova.
Spıker Qazaqstanda onkologııalyq naýqastar úshin emdeý tegin ekenin eske saldy. Oǵan hırýrgııalyq emdeý, sáýlelik terapııa, hımıoterapııa, maqsatty terapııa, ımmýnoterapııa kiredi. Jyl saıyn naýqastardy emdeýge 66 mlrd teńgeden astam qarajat qajet.
