Qazaqstanda 1922 aýylda aýyz sý problemasy bar
Bul týraly Indýstrııa jáne ınfraqurylymdyq damý mınıstri Beıbit Atamqulov halyq aldyndaǵy esebinde aıtty.
«Búgingi kúni respýblıka halqynyń 94,1 paıyzy, ıaǵnı 17,7 mln adam sýmen qamtamasyz etilgen. Onyń ishinde 10,7 mln qala halqy jáne 7 mln aýyl halqy bar. Qazaqstanda 6316 aýyl bar bolsa, sonyń ishinde 4394 aýylda aýyzsý máselesi sheshilgen. Sýmen jabdyqtaýǵa qoly jetpeı otyrǵan 1922 aýyldyń 793-inde ortalyqtandyrylǵan sý qubyryn salý josparlanǵan. Al qalǵan 1129 aýylda turǵyndar sany 200 adamnan aspaıdy. Mundaı eldi mekenderde jergilikti sý tazartý júıesi ornatylady», - dedi vedomstvo basshysy.
Mınıstr bıyl sýmen jabdyqtaý jáne sý burý júıelerin damytý jobalaryna respýblıkalyq bıýdjetten 151,4 mlrd teńge bólingenin eske saldy.
«Jyl aıaǵynda qala halqynyń 98%-y jáne aýyl halqynyń 91,8%-y sýdan tapshylyq kórmeıtin bolady. 2025 jylǵa deıin halyqty aýyzsýmen 100% qamtamasyz etý josparlanǵan», - dedi Beıbit Atamqulov.
