Qazaqstanda 19 myń sheteldik eńbek etip jatyr
NUR-SULTAN. QazAqparat - Qazaqstanda 19 myńnan astam sheteldik eńbek etip jatyr, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Mınıstrliktiń málimetinshe, 2020 jylǵy 1 aqpandaǵy jaǵdaı boıynsha Qazaqstan aýmaǵynda jergilikti atqarýshy organdardan ruqsat alǵan 19 137 sheteldik azamat eńbek qyzmetin júzege asyrady.
«Olardyń ishinde birinshi sanat boıynsha (basshylar jáne olardyń orynbasarlary) 753 adam (4%), ekinshi sanat boıynsha (qurylymdyq bólimshelerdiń basshylary) – 4 364 (23%), úshinshi sanat boıynsha (mamandar) – 9 613 (50%), tórtinshi sanat boıynsha (bilikti jumysshylar) – 1 749 (9%), maýsymdyq jumystarda – 926 (5%), korporatıvtik aýystyrý sheńberinde 1 732 adam (9%) tartyldy», delingen habarlamada.
Sheteldikterdi tartqan jumys berýshiniń sany – 2 021, olarda 479 342 qazaqstandyq jumys isteıdi, bul qyzmetkerlerdiń jalpy sanynyń 96%.
«Sheteldikterdiń basym bóligi qurylys salasynda – 8 582 adam (45%) jumys isteıdi. Taý-ken ónerkásibinde 2 228 adam (12%), óńdeý ónerkásibinde – 1 586 (8%), kásibı, ǵylymı jáne tehnıkalyq qyzmette 1 397 sheteldik (7%) jumys isteıdi», delingen habarlamada.
Eńbekshi mıgranttardyń negizgi shyǵý elderi: Qytaı – 5 266 adam (28%), Túrkııa – 1 935 (10%), Úndistan – 1 896 (10%), Ulybrıtanııa – 1 434 (8%), Ózbekstan – 965 (5%).
Eske sala ketsek, ishki eńbek naryǵyn qorǵaý maqsatynda QR Úkimeti jyl saıyn respýblıkaǵa sheteldik mamandardy tartý kvotasyn belgileıdi. 2020 jylǵa arnalǵan kvota jumys kúshiniń sanyna qatysty 0,32% nemese 29,3 myń birlik mólsherinde bekitildi.
Aıta keterligi, elimizde sheteldik jumyskerlerdi tartýǵa arnalǵan kvota 40 paıyzǵa qysqartylǵan.
