Qazaqstanda 19,7 myń tonna balmuzdaq óndirildi
ASTANA. QazAqparat - Bıylǵy 5 aıda Qazaqstanda 19,7 myń tonna balmuzdaq pen taǵamdyq muz óndirildi. Ótken jyldyń qańtar-mamyrymen salystyrǵanda bul 38,1% artyq, dep habarlaıdy QazAqparat Ulttyq statıstıka bıýrosyna silteme jasap.
Jalpy 2022 jyly Qazaqstanda 41,3 myń tonna balmuzdaq óndirildi. Osy rette 9,2 myń tonna ónim ımporttalǵan, syrttan ákelinetin ónimniń úles salmaǵy – 18,3%. Ózge elderden balmuzdaq jiberetin elderdiń alǵashqy úshtigine Reseı (5,6 myń tonna), Qyrǵyzstan (2,1 myń tonna) jáne Túrkııa (911,5 tonna) kiredi. Sondaı-aq ótken jyly balmuzdaq Belarýs, Ýkraına, Belgııa, Frantsııa, Italııa, Shveıtsarııa jáne Koreıadan ákelindi.
«Ótken jyldyń 12 aıynda 5 myń tonna balmuzdaq eksporttaldy. Qazaqstannan ónim TMD elderine (4,9 myń tonna), sondaı-aq Mońǵolııaǵa (72,6 tonna) jiberilgen», - dep jazdy vedomstvodan.
