Qazaqstanda 19,1 mln tonna astyq bastyryldy
«2019 jyly egin jınaý jumystary ýaqtyly bastalyp, oblys ákimdikteriniń derekterine sáıkes jalpy dándi daqyldar egilgen 15,2 mln gektardyń 15,1 mln gektarynda ónim jınaldy. 19,1 mln tonna astyq bastyryldy. Bıyl jazdyń ystyq jáne qurǵaq bolýyna baılanysy dándi daqyldar ónimdiligi tómendegenin atap ótkim keledi. Osynyń saldarynan ótken jylmen salystyrǵanda dándi daqyldar óndirisiniń tómendeýi kútilýde», - dedi mınıstr Úkimet otyrysynda.
Onyń aıtýynsha, jazdyń aptap ystyǵynan basqa, egin jınaý jumystary barysynda uzaq merzimdi (jalpy eseppen 15-20 kún) jaýyn-shashyn bolyp, bul óz kezeginde astyqtyń sapasyna da, ónimdiligine de áser etken.
«Qazirgi esepter boıynsha bıyl dándi jáne dándi burshaq daqyldarynyń ónimdiligi býnkerlik salmaqta 19 mln tonnany quraýy múmkin. Bul 2018 jylǵy ónimmen salystyrǵanda 2 mln tonnaǵa kem. Jalpy jınalǵan jańa ónimnen 2,9 mln tonna elevatorlarǵa kelip tústi, onyń 1,8 mln tonnasyn bıdaı, 700 myń tonnasy arpa. Jedel derekterge sáıkes, elevatorlarǵa kelip túsken bıdaıdyń 80 paıyzǵa jýyǵy azyq-túlikke, 20 paıyzy mal azyǵyna jáne tehnıkalyq maqsatqa arnalǵan bıdaı. Ótken jyly azyq-túlik bıdaıynyń kólemi 93 paıyz bolǵan», - dedi Saparhan Omarov.