Qazaqstanda 183-shi «Aýyl qutqarýshylary» órtke qarsy beketi ashyldy
ASTANA. KAZINFORM — Soltústik Qazaqstan oblysy Jambyl aýdanynyń Troıtskoe aýylynda 183-shi «Aýyl qutqarýshylary» erikti órtke qarsy beketi paıdalanýǵa berildi, dep habarlaıdy TJM baspasóz qyzmeti.
Jańa beket 700-den astam adam turatyn Troıtskoe jáne Ortalyq aýyldaryn órtten qorǵaýdy qamtamasyz etedi.
183-shi «Aýyl qutqarýshylary» beketi aýyl sharýashylyǵy taýar óndirýshisiniń bazasynda quryldy.
— Renovatsııa barysynda dıspetcherlik, as úı, jatyn bólme, kıim aýystyratyn bólme, sanıtarlyq torap jáne garaj qarastyrylǵan. Nysan elektr, sýmen jabdyqtaý, káriz júıesi jáne jylytý sııaqty barlyq qajetti kommýnaldyq jaǵdaılarmen qamtamasyz etilgen, — delingen habarlamada.
Bólimsheni jaraqtaý úshin departament órt sóndirý avtotsısternasyn, órt-tehnıkalyq jaraqtardy, jabdyqtar men baılanys quraldaryn berdi.
Eriktiler táýlik boıy kezekshilik atqaryp, tótenshe jaǵdaılarǵa jedel den qoıýdy qamtamasyz etedi.
Bekettiń ashylýy shaqyrý ornyna jetý ýaqytyn edáýir azaıtýǵa, órt qaýipsizdigi deńgeıin arttyrýǵa jáne aýyldyq eldi meken turǵyndaryn senimdi qorǵaýmen qamtamasyz etýge múmkindik beredi.
Osydan buryn SQO-da aýyldaǵy jańa órt sóndirý pýnkti maman joqtyǵynan jabyq turǵanyn jazǵan edik.
