Qazaqstanda 182 apatty jaǵdaıdaǵy jáne 112 úsh aýysymdaǵy mektep bar - QR BǴM
ASTANA. 15 qańtar. QazAqparat - Qazaqstanda 182 apatty jáne 112 úsh aýysymdaǵy mektepter bar. Bul týraly búgin Bilim jáne ǵylym mınıstrliginde ótken baspasóz máslıhaty barysynda vedomstvonyń vıtse-mınıstri Esenǵazy Imanǵalıev málim etti.
Vıtse-mınıstrdiń aıtýynsha, aǵymdaǵy jyldyń 1 qańtaryndaǵy jaǵdaı boıynsha jobalyq qýaty 43 myń 751 oqýshy ornyn quraıtyn 124 jalpy orta bilim berý mektepteri iske qosyldy. Onyń 80-i jergilikti bıýdjet esebinen, 44-i respýblıkalyq bıýdjet esebinen atqarylǵan. «58 mektep apatty jaǵdaılardaǵy mektepterdi almastyrsa, 20-sy úsh aýysymdylyqty joıýǵa baǵyttaldy. Sonymen birge, 40 mektep mektepterdegi oryn tapshylyǵyna oraı salynǵan bolsa, 6-y halyq sanynyń ósiminiń artýyna qatysty iske qosyldy», - deıdi vıtse-mınıstr.
Onyń sózine qaraǵanda, búgingi kúni Qazaqstanda apatty jaǵdaıdaǵy mektepter sany 182 bolsa, sonyń basym kópshiligi Ońtústik Qazaqstan, Jambyl, Qyzylorda, Atyraý jáne Almaty oblystaryna tıesili. Al Mańǵystaý, Almaty, Ońtústik Qazaqstan oblystary men Astana qalasyndaǵy mektepterdiń birqatary úsh aýysymda istep tur. Bulardyń sany 112-ni quraıdy.
