Qazaqstanda 1800 áskerı qyzmetshi arzan baspanaǵa qol jetkizdi
Atalǵan baǵdarlamany Turǵyn úı qurylys jınaq banki («Báıterek» holdınginiń enshiles uıymy) byltyr iske qosqan bolatyn.
Bank janyndaǵy Qoǵamdyq keńes tóraǵasy, belgili jýrnalıst Sergeı Ponomarev Almaty, Astana, Taraz jáne Semeı qalalaryndaǵy áskerı bólimderge baryp, jańa turǵyn úı baǵdarlamasy boıynsha nesıelendirý sharttaryn túsindirip, áskerı qyzmetshilerdiń oıyn bilip qaıtty. Sharaǵa banktiń basqarma tóraıymy Lázzat Ibragımova da qatysty.
«Áskerı bólimderge jasalǵan sapar nátıjesinde bank klıenti atanǵan Otan qorǵaýshylardyń pikirleri men eskertýleri jınaldy. Qolǵa túsken aqparattyń bárin bank basshylyǵyna tapsyrdym jáne aldaǵy jyly áskerı qyzmetshilerdiń bul usynystary eskeriledi dep úmittenem. Búginge deıin olarǵa 1 800-den astam jeńildetilgen zaem berilgen, al 300-deı nesıe ótinishini qarastyrylyp jatyr. Banktiń qoldaýy men Qoǵamdyq keńestiń baqylaýynyń arqasynda áskerı mamandar páter jaldaýshydan baspana ıesine aınaldy. Bul ıgi is jalǵasyn tabady dep senemin», - dedi Sergeı Ponomarev.
Jańa jobalar men aktsııalardan bólek, Qoǵamdyq keńes músheleri bankpen birigip turǵyn úı qurylys jınaq júıesiniń eń basty maqsatyn elge jetkizip keledi. Basqasha aıtqanda, tabysyna qaramastan barlyq azamattarǵa qarajat jınap, keıin úı satyp alýǵa nemese salýǵa tıimdi nesıe rásimdeý múmkindigin berýdi nasıhattaýdy jalǵastyryp otyr.
«Halyqtyń qarjylyq saýatynyń ósýi Qoǵamdyq keńespen birlesip júrgizilgen jumystyń nátıjeli bolǵanyn bildiredi. Buǵan tutynýdy emes, qarajat únemdep, aqsha jınaýdy jón kórgen Turǵyn úı qurylys jınaq banki salymshylary sanynyń óskeni dálel. 2018 jyldyń 11 aıynda bankte 347 574 jańa depozıt ashyldy. Jalpy alǵanda, bizdiń bankte qazir 1,2 mıllıonnan astam adam baspanaly bolamyn dep qarajat jınap jatyr. Olardyń shottaryndaǵy jalpy jınaq somasy 583,3 mlrd teńgeni quraıdy», - dedi «Turǵyn úı qurylys jınaq banki» AQ Basqarma tóraıymy Lázzat Ibragımova.
Statıstıka boıynsha, bir jyldyń ishinde bank áskerı qyzmetshilerge quny 28,2 mlrd teńge bolatyn 1845 nesıe bergen. Onyń ishinde Qorǵanys mınıstiligine - 11 mlrd 071 mln teńge bolatyn 716 nesıe, Ulttyq Qaýipsizdik Komıteti qyzmetkerlerine - 3 mlrd 615 mln teńge bolatyn 546 nesıe, Ulttyq ulan qyzmetkerlerine - 5 mlrd 860 mln teńge bolatyn 427 nesıe, jáne basqa da qyzmetkerlerge quny 2 mlrd 684 mln teńge bolatyn 156 nesıe bergen.
