Qazaqstanda 18 myń adam pallıatıvtik kómekke zárý - Densaýlyq saqtaý mınıstrligi
ASTANA. 11 maýsym. QazAqparat - Qazaqstanda 18 myń adam pallıatıvtik kómekke zárý. Bul týraly búgin QR Parlamenti Májilisiniń Áleýmettik-mádenı damý komıtetiniń otyrysynda QR Densaýlyq saqtaý vıtse-mınıstri Bolat Tókejanov málim etti. Darıǵa Nazarbaevanyń jetekshiligimen ótken otyrysta Qazaqstandaǵy pallıatıvtik kómek máseleleri talqylanǵan bolatyn.
«Adamnyń abyroımen qaıtys bolý quqyǵy 1981 jyly patsıentter quqyqtarynyń eń tómengi halyqaralyq standarttarynyń Lıssabon deklaratsııasyna engen bolatyn. Daýasyz naýqastarǵa pallıatıvtik kómek kórsetý kóptegen álem elderiniń klınıkalyq medıtsınasynyń jáne qoǵamdyq densaýlyq saqtaýynyń basym baǵyttarynyń birine jatqyzylady. Bizdiń elimiz de pallıatıvtik kómek kórsetetin naýqastar problemasy erekshe nazar aýdarýdy qajet etedi», - dedi B. Tókejanov.
Vıtse-mınıstrdiń aıtýyna qaraǵanda, Qazaqstanda pallıatıvtik kómekke muqtaj 18 myń adam bolsa, olardyń 75 paıyzy - onkologııalyq aýrýlarǵa shaldyqqandar. Al 25 paıyzy sozylmaly, daýasyz dertke dýshar bolyp otyr. «Qazir Qazaqstan boıynsha pallıatıvtik kómek kórsetetin 11 ortalyq bar. Sol 11 ortalyq aımaq jáne 9 qalada ornalasqan. Jalpy, pallıatıvtik kómek kerek adamdarǵa el boıynsha 384 tósek orny qarastyrylǵan», - dedi vıtse-mınıstr.
