Qazaqstanda 1,8 mln gektardan astam aýmaq shegirtkege qarsy óńdeldi
ASTANA. KAZINFORM – Qazaqstan aýmaǵynda shegirtke zııankesteriniń taralýyna baılanysty jaǵdaı Aýyl sharýashylyǵy mınıstrliginiń baqylaýynda.
Esterińizge sala keteıik, 2024 jyly Qazaqstan aýmaǵynda 2,5 mln ga alqapta úıirli shegirtkelerdiń taralýy boljandy, dep habarlaıdy mınıstrliktiń baspasóz qyzmeti.
26 maýsymdaǵy jaǵdaı boıynsha 1,8 mln gektardan astam aýmaq qorǵaý sharalarymen qamtyldy. Oǵan 2500 adam tartyldy, 427 arnaıy búrikkish tehnıka qoldanylýda.
Mamandardyń málimetinshe, qoldanylatyn preparattardyń tıimdiligi 85%-dy quraıdy.
Aqtóbe oblysynda ıtalııa prýsy men azııalyq shegirtkege qarsy qorǵanys is-sharalary barlyq 12 aýdanda júrgizilýde.
Búgingi tańda óńdeýge josparlanǵan 784 myń gektardyń 540 myń gektarynda jumystar aıaqtaldy, 74 tehnıka jumyldyrylǵan.
Túrkistan oblysynda hımııalyq óńdeý aıaqtaldy, marokkolyq shegirtkeden 366 myń gektar jer óńdeldi. Jańadan anyqtalǵan qosymsha oshaqtar tazartylýda.
Qostanaı oblysynda ıtalıan prýsy men azııalyq shegirtkege qarsy 409 myń ga óńdeldi. 130 qyzmetker tartyldy. 55 tehnıka paıdalanylýda. Іs-sharalar jalǵasýda.
Aýyl sharýashylyǵy mınıstriniń tapsyrmasy boıynsha óńirde Agroónerkásiptik keshendegi memlekettik ınspektsııa komıtetiniń tóraǵasy Darhan Ábdikárimov júr.
Almaty, Atyraý, Shyǵys Qazaqstan, Jambyl, Jetisý, Batys Qazaqstan, Qyzylorda, Qaraǵandy, Pavlodar, Abaı oblystarynda 505 myń ga óńdelgen.
Sharýalar óńdeýge qoldaý kórsetýde: atap aıtqanda, sý jetkizýge kómektesedi, shegirtke zııankesteriniń shoǵyrlaný oryndary týraly habarlaıdy.
Aqmola, Soltústik Qazaqstan jáne Ulytaý oblystarynda hımııalyq óńdeýler júrgizý óńdeýge jatatyn alqaptardyń anyqtalýyna qaraı bastalady.
Jaǵdaı turaqty, monıtorıngtik zertteýler jalǵasýda. Qorǵanys is-sharalaryn ýaqtyly júrgizý úshin preparattar men tehnıka jetkilikti.
Shekara mańyndaǵy aýmaqtardaǵy jaǵdaı baqylaýda.
AShM ýaqtyly qorǵaý is-sharalaryn uıymdastyrý boıynsha túbegeıli sharalar qabyldanýda.
«Azamattar men buqaralyq aqparat quraldaryn jalǵan málimetterge senbeýge jáne tek resmı derekkózderden alynǵan aqparatty basshylyqqa alýǵa shaqyramyz»,-delingen habarlamada.
