Qazaqstanda 175-shi «Aýyl qutqarýshylary» pýnkti ashyldy
ASTANA. KAZINFORM - Batys Qazaqstan oblysy Aqjaıyq aýdanynyń Qabyrshaqty aýylynda aýyldyq eldi mekenderdiń órt qaýipsizdigin qamtamasyz etý maqsatynda jańǵyrtylǵan erikti órt sóndirý pýnkti paıdalanýǵa berildi, dep habarlaıdy QR Tóteshe jaǵdaılar mınıstrliginiń baspasóz qyzmeti.
Erikti órt sóndirý pýnktiniń ashylý rásimine Batys Qazaqstan oblysy Tótenshe jaǵdaılar departamenti bastyǵynyń mindetin ýaqytsha atqarýshy Eldos Battalov, Aqjaıyq aýdanynyń ákimi Murat Serdalın, sondaı-aq aýyl turǵyndary qatysty.
Eriktilerdiń táýlik boıy kezekshilik atqarýy úshin bekette qolaıly jaǵdaı jasalǵan. Turmystyq úı-jaılar, jeke quramnyń demalys bólmeleri jáne qajetti ınfraqurylym jabdyqtalǵan. Pýnkt teńgerimine vedomstvo tarapynan órt sóndirý avtotsısternasy, jeńil avtomobıl, jaýyngerlik kıim jıyntyqtary men baılanys quraldary berildi.
Qabyrshaqty aýylynda ashylǵan «Aýyl qutqarýshylary» pýnkti Qabyrshaqty aýylynyń ózimen qatar, Bitik, Jambyl jáne Úshtóbe aýyldaryn qosa alǵanda, 1500-den astam turǵyny bar 4 eldi mekenniń órt qaýipsizdigin qamtamasyz etýge múmkindik beredi. Mundaı beketterdi shalǵaı eldi mekenderde qurý tótenshe jaǵdaılar ornyna jetý ýaqytyn edáýir qysqartyp, órtterdi sóndirý jedeldigin arttyrýǵa, azamattardyń ómiri men densaýlyǵyn qorǵaýǵa, sondaı-aq materıaldyq shyǵyndardy azaıtýǵa yqpal etedi.
Saltanatty rásim pýnkt aýmaǵyna qylqan japyraqty aǵash kóshetterin otyrǵyzýmen aıaqtaldy.
Osyǵan deıin Pavlodar oblysynda «Aýyl qutqarýshylary» beketi iske qosylǵany týraly jazdyq.
