Qazaqstanda 173-shi «Aýyl qutqarýshylary» pýnkti ashyldy
ASTANA. KAZINFORM — Abaı oblysy Aıagóz aýdanynyń Aqshı aýylynda «Aýyl qutqarýshylary» vedomstvolyq baǵdarlamasy aıasynda jańartylǵan erikti órt sóndirý pýnkti paıdalanýǵa berildi, dep habarlaıdy TJM baspasóz qyzmeti.
Atalǵan bastama shalǵaı aýyldyq eldi mekenderdegi qaýipsizdik deńgeıin arttyrýǵa jáne tótenshe jaǵdaılarǵa jedel den qoıý júıesin jetildirýge baǵyttalǵan.
Saltanatty ashylý rásimine oblystyq Tótenshe jaǵdaılar departamenti bastyǵynyń orynbasary Jambyl Jabaev, Aıagóz aýdany ákiminiń mindetin atqarýshy Aıbek Nuǵymarov jáne aýyl turǵyndary qatysty.
Eriktilerdiń táýlik boıy kezekshilik atqarýy úshin bekette barlyq qajetti jaǵdaı jasalǵan. Jeke quramǵa arnalǵan turmystyq úı-jaılar men demalys bólmeleri qarastyrylyp, tıisti ınfraqurylymmen qamtamasyz etilgen.
Sonymen qatar beket órt sóndirý avtotsısternasymen, órt-tehnıkalyq jabdyqtarmen, arnaıy qorǵanysh kıimimen jáne baılanys quraldarymen jaraqtalǵan.
— Jańa nysan Aqshı jáne Aqtúbek aýyldaryna, sondaı-aq onnan astam qystaqqa qyzmet kórsetedi. Qyzmet kórsetý aımaǵynda 182 turǵyn úı ornalasqan, halyq sany 678 adam. Osyndaı beketterdiń shalǵaı eldi mekenderde ashylýy tótenshe jaǵdaılarǵa den qoıý ýaqytyn edáýir qysqartyp, órt sóndirý tıimdiligin arttyrýǵa, sondaı-aq adam ómirin qutqarýǵa, materıaldyq shyǵyndy azaıtýǵa múmkindik beredi, — delingen vedomstvo habarlamasynda.
Іs-shara beket aýmaǵynda aǵash otyrǵyzýmen aıaqtaldy.
Budan buryn TJM tabıǵatta jáne sý jaǵasynda qaýipsizdik erejelerin saqtaýǵa shaqyrdy.
