Qazaqstanda 1,7 mln adam júrek-qantamyr aýrýlaryna tekserýden ótti
ASTANA. KAZINFORM – 2025 jyly arterııalyq gıpertonııa men júrektiń ıshemııalyq aýrýyn erte anyqtaýǵa baǵyttalǵan skrınıngten 1,7 mıllıon adam ótti. Sonyń nátıjesinde 114 myńnan astam azamattan qanaınalym júıesi aýrýlary anyqtaldy, dep habarlaıdy Densaýlyq saqtaý mınıstrligi.
Vedomstvonyń málimetinshe, anyqtalǵan naýqastardyń 99 myńyna arterııalyq gıpertonııa, al 15 myńyna júrektiń ıshemııalyq aýrýy dıagnozy qoıylǵan.
– 2025 jyly arterııalyq gıpertonııa men júrektiń ıshemııalyq aýrýyn erte anyqtaýǵa baǵyttalǵan skrınıng sheńberinde 1,7 mıllıon adam tekserýden ótti. Nátıjesinde 114 myńnan astam azamatta qanaınalym júıesi aýrýlary erte satysynda anyqtaldy. Onyń ishinde 99 myń patsıentke arterııalyq gıpertonııa, 15 myń patsıentke júrektiń ıshemııalyq aýrýy dıagnozy qoıyldy, – dep málimdedi mınıstrlik.
Mınıstrlik málimetinshe, ótken jyldan bastap skrınıng baǵdarlamasyna joǵary sezimtal zamanaýı dıagnostıkalyq ádister engizilgen. Bul aýrýlardy erte kezeńde anyqtap, emdeýdi der kezinde bastaýǵa múmkindik beredi.
Qazirgi ýaqytta elimizde júrek-qantamyr aýrýlary bar shamamen 1,9 mıllıon adam dınamıkalyq baqylaýda tur. Dárigerlerdiń aıtýynsha, turaqty medıtsınalyq baqylaý, qaýip faktorlaryn qadaǵalaý jáne qajetti dári-dármekpen qamtamasyz etý aýyr asqynýlardyń aldyn alýǵa yqpal etedi.
– Dúnıejúzilik densaýlyq saqtaý uıymynyń málimetine sáıkes, qanaınalym júıesi aýrýlary álemdegi ólim-jitimniń negizgi sebebi bolyp qala beredi. Jyl saıyn bul dertten shamamen 19,8 mıllıon adam qaıtys bolady. Bul álemdegi barlyq ólim jaǵdaılarynyń shamamen 32%-yn quraıdy, – delingen mınıstrlik aqparatynda.
Aıta keteıik, Qazaqstanda bir jylda júrekke 13 myńnan astam ashyq operatsııa jasaldy.
