Qazaqstanda 17 myń stýdent psıhologııa mamandyǵynda bilim alyp júr
ASTANA. KAZINFORM — Qazir elimizde 17 myń stýdent psıhologııa mamandyǵynda bilim alyp júr. Sarapshylardyń aıtýynsha, qoǵamda psıholog kómegine júginý mádenıeti qalyptasyp kele jatyr.
Bul týraly «Psıhologııalyq qyzmet týraly» zań qabyldanǵannan keıin psıhologııalyq qyzmet kórsetý naryǵyn retteý máselesine arnalǵan BIZDIÑ ORTA podkastynda aıtyldy.
Lev Gýmılev atyndaǵy Eýrazııa ulttyq ýnıversıteti psıhologııa kafedrasynyń meńgerýshisi Álııa Mámbetalınanyń aıtýyna qaraǵanda, búginde psıhologııa mamandyǵyn tańdaǵan stýdentterdiń resmı sany 17 myńǵa jetken.
— Bul kórsetkish jyl saıyn mektep túlekteriniń «Psıhologııa» mamandyǵyn tańdaıtynyn bildiredi, ıaǵnı elimizde psıhologqa júginý mádenıeti birtindep qalyptasyp keledi, — dedi ol.
Al Qazaqstan qoǵamdyq damý ınstıtýty Qoǵamdyq úderisterdi zertteý ortalyǵynyń dırektory Álııa Masálimova elimizde psıhologtardy daıarlaý jáne olardyń jumyspen qamtylýy týraly málimettermen bólisti.
Onyń aıtýynsha, Qazaqstanda jyl saıyn bakalavrıat, magıstratýra jáne doktorantýra baǵdarlamalary boıynsha shamamen 4 myń psıholog daıarlanady. Mamandardy 43 joǵary oqý orny oqytady. Túlekterdiń 73-76 paıyzy jumysqa ornalasady.
Sarapshynyń málimetinshe, elimizde klıenttermen jumys isteý tájirıbesi bar 1,5 myńǵa jýyq dıplomdy praktık-psıholog bar. Sonymen qatar mektepterde 8 myńnan astam pedagog-psıholog eńbek etedi.
Álııa Masálimova jańa zań kúshine engennen keıin bir jyl ishinde psıhologtardyń memlekettik tizimi jasaqtalatynyn aıtty.
— Osy merzim aıaqtalǵannan keıin ǵana mamandar zań talaptaryna sáıkes resmı túrde psıholog retinde qyzmet kórsete alady, — dedi ol.
Aıta keteıik, buǵan deıin, psıholog pen psıhıatrdyń aıyrmashylyǵyn jazǵan edik.
