Elimizde 17 myń adamǵa raqymshylyq jarııalanýy múmkin
ASTANA. KAZINFORM — Májilis depýtaty Snejanna Imasheva Qazaqstanda josparlanǵan ákimshilik jáne qylmystyq raqymshylyqqa qatysty túsinik berdi.
Depýtattyń sózine qaraǵanda, tıisti zań jobalary áli de daıarlyq satysynda.
Ákimshilik raqymshylyq boıynsha memlekettik organdar salǵan aıyppuldardy esepten shyǵarý múmkindigi qarastyrylyp jatyr.
— San jaǵynan alǵanda, bizde aıyppuldar óte kóp, 600-den astam túri bar. Qazir osy aıyppuldardyń qaısysy qamtylatynyn talqylap jatyrmyz. Árıne, qorshaǵan orta men sanıtarlyq qaýipsizdikke qatysty zań buzý derekteri boıynsha aıyppuldar esepten shyǵarylmaıdy. Mysaly, sanıtarlyq erejelerdi buzý týraly bap bar. Osy bapta adamdardyń densaýlyǵy men ómirine qaýip tóndiretin áreketterge qatysty norma eskerilgen, — dedi Snejanna Imasheva Parlament Májilisinde tilshiler suraǵyna jaýap bere otyryp.
Depýtat ákimshilik raqymshylyq birneshe mıllıon aıyppulǵa áser etýi múmkin ekenin atap ótti.
- Men qazir adamdardyń sanyn aıta almaımyn, óıtkeni bir adamǵa 10 aıyppul salynýy múmkin», - dep túsindirdi ol.
Sonymen qatar ol qylmystyq amnıstııaǵa qatysty túsinik berdi.
— Negizinen, qylmystyq raqymshylyq aýyr emes jáne ortasha aýyrlyqtaǵy qylmystardy qamtıdy. Bul - shamamen 17 myń adam, - dedi ol.
Zań jobasyn mamyr aıynyń basynda Parlamentke engizý josparlanǵan.
Eske salsaq, buǵan deıin elde qylmystyq jáne ákimshilik quqyqbuzýshylyq boıynsha raqymshylyq jarııalanatyny málim boldy.
Aıta keteıik, byltyr Konstıtýtsııanyń 30 jyldyǵy aıasynda raqymshylyq jasalǵan edi.
