Qazaqstanda 16 myńnan astam sertıfıkatsyz pırotehnıka tárkilendi
25 jeltoqsan men 3 qańtar aralyǵynda respýblıkada «Pırotehnıka» jedel-profılaktıkalyq is-sharasy ótti. Onyń maqsaty – jańa jyldyq mereke qarsańynda qoǵamdyq qaýipsizdikti qadaǵalaý.
Osy kúnderi polıtseıler men TJD qyzmetkerleri jeke jáne zańdy tulǵalardyń azamattyq pırotehnıkalardyń aınalymyna jáne onyń qaýipsizdik erejelerin saqtaýyna qadaǵalaý jumystaryn júrgizdi. Máselen, pırotehnıkalyq buıymdardy satý erejelerin buzǵany úshin 842 adam ákimshilik jaýapkershilikke tartyldy, onyń ishinde ÁQBtK-niń 196-baby (Zańsyz saýda) boıynsha – 829, ÁQBtK-niń 436-baby boıynsha (Bólinbegen oryndarda qoldaný) – 11, ÁQBtK-niń 483-baby boıynsha (Saqtaý jáne tasymaldaý tártibin buzý) 2 adam bar.
Sonymen qatar jańa jyl qarsańynda otshashýdy qoldaný kezinde kúıik shalýdyń 15 faktisi tirkeldi, onyń ishinde zardap shekken 6 kámeletke tolmaǵan bala bar. Mysaly, elordada 1 qańtarda túnde úıdiń aýlasynda er adam eki kámeletke tolmaǵan balasymen birge otshashýdy qoldanǵan kezde erni men qolyna termııalyq kúıik alǵan.
Taǵy bir oqıǵa Astanada Nájimedenov kóshesinde boldy. Pırotehnıkany durys qoldanbaý saldarynan balkon órtenip ketti. Zardap shekkender joq. Páter ıesi polıtsııaǵa júginbedi. JPІSh ótkizý kezeńinde barlyǵy 16 400 birlik sertıfıkattalmaǵan pırotehnıkalyq ónim tárkilendi.
Foto: polisia.kz
