Qazaqstanda 16 myńǵa jýyq adam jat dinı aǵymdar jeteginde júr
ASTANA. QazAqparat - Elimizde jat aǵym jeteginde 15-16 myń qazaqstandyq ketken. Bul týraly QR MSM Din ister komıtetinen Balǵabek Myrzaev málim etti.
«Beıresmı derekter boıynsha 15-16 myńdaı adam. Onyń ishinde takfırıster, jıhadıster dep túrli aǵymdarǵa bólinip jatady. Al Sırııaǵa 500-ge jýyq adam ketken. Sondyqtan biz osy máselelerdiń barlyǵyn zerttep, taldap, olardyń teris baǵytqa ketýine ne sebep ekendigin jan-jaqty saraptaýdamyz. Qazirdiń ózinde «Aq-nıet» ońaltý ortalyǵy jat aǵym qurbandarymen jumys jasaýda», - dedi B.Myrzaev.
Imamdardyń aıtýynsha, búginde meshitke keletin jamaǵattyń 85-90 paıyzy jastar. Al jalpy elimizdegi rýhanı izdeniske túsken jandar ǵalamtor arqyly jat aǵymdardyń ýaǵyz-nasıhatyna ılanyp jatady.
«Bul ulttyq problema. Sebebi qanshama qarakózderimiz temir torǵa toǵytylyp, taǵdyrlary talqandalyp jatyr. Endi osy olqylyqtyń ornyn toltyryp, budan keıin ózgelerdiń jat aǵym qurbany bolmaýy úshin jan-jaqty eńbek etýimiz mańyzdy», - dedi Nur-Múbarak ýnıversıtetiniń prorektory, professor Shamshádın Kerim myrza.
Aıta keteıik, Nur-Múbarak ýnıversıtetinde «Ekstremızmniń aldyn alý salasyndaǵy mamandardy qaıta daıarlaý ınstıtýty» ashyldy. Osy jaǵdaılardy eskere otyryp, aldaǵy 1-2 jylda 200-300-ge deıin maman qaıta daıarlaý kýrsynan ótpek.
