Qazaqstanda 16 myń ÚEU belsendi jumys isteıdi

NUR-SULTAN. QazAqparat – Elordada úkimettik emes uıymdardyń ókilderi «Táýelsizdiktiń 30 jyldyǵy ótkizýdegi azamattyq sektordyń róli» taqyrybynda kezdesý ótkizdi, dep habarlaıdy QazAqparat tilshisi.

«Shyn máninde memlekettiń Táýelsizdigi men azamattyq qoǵamnyń damýy – bul ózara tyǵyz baılanysty ári bir-birine táýeldi uǵymdar. Óıtkeni, Táýelsizdikke ákeletin eldiń jańkeshti kúresi bolsa, sol Táýelsizdikti qolda ustap turatyn eń aldymen belsendi, otanshyl azamattardyń úlesi», - dedi kezdesýdi ashqan QR Aqparat jáne qoǵamdyq damý vıtse-mınıstri Bolat Tilepov.

Onyń dereginshe, Táýelsizdiktiń eleń-alańynda elimizde birneshe ondaǵan ǵana ÚEU bolsa, búginde tirkelgen mundaı qoǵamdyq uıymdardyń sany 22 myńnan asyp jyǵylady. Al solardyń 16 myńy belsendi jumys isteıdi. Azamattyq sektorda shamamen 24 myń adam jumyspen qamtylǵan. Olardyń 9 paıyzy jastar saıasaty jáne balalar bastamasy salasynda, 34 paıyzy halyqtyń az qamtylǵan tobyn qoldaý, bilim men ǵylym, sport pen dene tárbıesi salalarynda, 16 paıyzy salaýatty ómir saltyn nasıhattaý, azamattar men uıymdardyń zańdy múddeleri men quqyqtaryn qorǵaý, 9 paıyzy genderlik problemalardy sheshý, qorshaǵan ortany qorǵaý, mádenıet pen ónderdi damytý salalarynda jumys isteıdi.

«Úkimettik emes uıymdardyń sandyq qurylymy azamattarymyzdy barynsha tolǵandyratyn problemalardy pash etedi. Osy turǵydan alǵanda úkimettik emes sektordy pikirlester qaýymdastyǵy retinde qarastyramyz. Olardyń kúsh-qýaty men qabileti elimizdegi oń ózgeristerdiń qozǵaýshysy sanalady. Bul osy mereılyq jylda aıryqsha mánge ıe», - dedi Bolat Tilepov.