Qazaqstanda 16 myń shaqyrym avtojolǵa monıtorıng jasalady

NUR-SULTAN. QazAqparat - QR IIDM Avtomobıl joldary komıtetiniń Jol aktıvteri sapasynyń ulttyq ortalyǵy respýblıkalyq mańyzǵa ıe avtomobıl joldaryn quraldyq monıtorıngiden ótkizý, joldardyń naqty jaǵdaıyna baǵa berý sharalaryna kiristi, dep habarlaıdy QazAqparat vedomstvonyń baspasóz qyzmetine silteme jasap.

Jyl sońyna deıin Jol aktıvteri sapasynyń ulttyq ortalyǵy avtojoldardyń 4665 shaqyrymyn quraldyq monıtorıngiden ótkizbek. Osylaısha «Jol aktıvterin basqarý júıesine» joldardyń ornalasqan oryndary, geometrııalyq parametrleri, jol qurylymdary, jol belgileri men tańbalary, kólik aǵymynyń qarqyndylyǵy men quramy biriktirilmek. Budan bólek, joldardyń tehnıkalyq jaǵdaıy anyqtalyp, olqylyqtar týraly derekter jınalǵan tizimdeme jasalady. Búginge deıin joldardyń 819 shaqyrymy dıagnostıkadan ótkizildi.

Sonymen qatar, mamandar respýblıkalyq mańyzy bar tasjoldardyń 11 680 shaqyrymynyń naqty jaǵdaıyna baǵasyn beredi. Osy rette qaýipsizdik boıynsha joldardyń reıtıngi qurylady. Jańa tehnıkalyq quraldarmen, joldardy zertteýge arnalǵan aspaptarmen jabdyqtalǵan jol zerthanalary búginge deıin joldardyń 1144 shaqyrymyn zertteýden ótkizdi.

Joldardy dıagnostıkadan ótkizý kezinde zamanaýı jabdyqtar qoldanylatynyn aıta ketý kerek. Ol quraldar jumysty tez ári sapaly júrgizýge, avtomobıl joldary men jasandy qurylymdardyń jaǵdaıy týraly tolyq málimet alýǵa múmkindik beredi. Bul óz kezeginde jóndeý júrgizilmegen problemalyq jol ýchaskelerin anyqtaýǵa úlken kómegin tıgizedi.