Qazaqstanda 16 myń dáriger koronavırýspen kúresip jatyr

NUR-SULTAN. QazAqparat – Elimizde 16 myń dáriger koronavırýspen kúresýde. Bul týraly QR Densaýlyq saqtaý mınıstri Eljan Birtanov Zakon.kz basylymynyń Instagram paraqshasyndaǵy tikeleı efırinde aıtty, dep habarlaıdy QazAqparat tilshisi.

«Biz ýaqytyly daıyndalǵandyqtan, mamandar jetkilikti. Búgingi kúni ınfektsııalyq aýrýhanalar, provızorlyq statsıonarlar, karantındik nysandarǵa 16 myń dáriger tartyldy. Dárigerler, medbıkeler, kishi medıtsınalyq personal, sanıtar-dárigerler, týberkýlez ortalyqtarynyń qyzmetkerleri eńbek etýde. Karantınge baılanysty belgili bir josparly kómekter, stomatologııalyq qyzmetter azaıdy. Óz erkimen kómek kórsetkisi keletin dárigerler sany kóbeıdi. Barlyq oblystyq densaýlyq saqtaý basqarmalarynan kadrlar jınalýda», - deıdi Eljan Birtanov.

Mınıstrdiń sózine sensek, koronavırýspen kúreske stýdent-dárigerler, joǵary kýrsta oqıtyn stýdentter de tartylyp otyr.

«Olardy jumys isteýge daıyndap jatyrmyz. Jalpy praktıkadaǵy dárigerdi koronavırýsty emdeıtin mamanǵa aınaldyrý qıyn emes. Árıne, olar tolyqqandy ınfektsıonıst bolyp ketpeıdi. Osyndaı jaǵdaıda eń bastysy - kómek kórsete alýy. Boıyn úreı bılegender de, jumystan bas tartqan dárigerler de bar. Mundaı jaǵdaı oryn almaýy múmkin emes ekenin bilemiz. Bul baǵyt boıynsha da jumys istep jatyrmyz. Sharalar qabyldanyp, materıaldyq jáne moraldyq kómek kórsetilýde. Prezıdent aqsha bólip, syıaqy men áleýmettik kepildik uıymdastyrǵany óte mańyzdy. Bul bizge dárigerlerdi qoldaýǵa kómektesedi», - deıdi ol.