Qazaqstanda 1,6 mln-nan astam motor maıy tsıfrlyq tańbalaýdan ótti

Bıylǵy 1 aqpannan bastap kúshine engen talapqa sáıkes, motor maılary mindetti tsıfrlyq tańbalaýǵa jatady. Qazirgi ýaqytta júıede 6,8 mıllıonnan astam tańbalaý kody tapsyrys berilip, taýar aınalymynyń 380-nen astam qatysýshysy tirkelgen.

Olardyń basym bóligin motor maılaryn óndirýshiler men ımporttaýshylar quraıdy.

– Búgingi tańda júıede 6,8 mln-nan astam kodqa tapsyrys berilip, 1,6 mln-nan astam motor maıy tańbalandy. Sondaı-aq júıede taýar aınalymynyń 380-nen astam qatysýshysy tirkelgen, – delingen Saýda jáne ıntegratsııa mınıstrliginiń habarlamasynda.

Jańa talapqa sáıkes bólshek saýda oryndary, maı aýystyrý ortalyqtary jáne avtosalondar tańbalanǵan ónimderdi satý kezinde Data Matrix kodyn mindetti túrde skanerleýi tıis.

Bul kod baqylaý-kassalyq mashına arqyly oqylǵannan keıin ónim tańbalaý júıesinde avtomatty túrde aınalymnan shyǵarylady.

Taýarlardy tańbalaý jáne qadaǵalaý aqparattyq júıesinde tirkelmegen nemese qajetti tehnıkalyq jabdyqpen qamtamasyz etilmegen kásipkerler tańbalanǵan ónimdi zańdy túrde sata almaıdy.

– Ákimshilik quqyq buzýshylyq týraly kodekste kassalyq chekte tańbalaý kodynyń kórsetilmeýi úshin jaýapkershilik kózdelgen, – dep eskertti mamandar.

Mamandardyń aıtýynsha, Data Matrix kody ónimniń shyǵý tegi, óndirýshiden tutynýshyǵa deıingi qozǵalysy, óndirilgen kúni men jaramdylyq merzimi týraly aqparatty qamtıdy. Sonymen qatar kod krıptografııalyq qorǵaýmen qamtamasyz etilgen.

Qazaqstan Respýblıkasy Saýda jáne ıntegratsııa mınıstrliginiń málimetinshe, 2026 jylǵy 1 qyrkúıekten bastap mindetti tsıfrlyq tańbalaýǵa jatatyn ónimder tizimi keńeıtiledi. Oǵan maılaý materıaldary men arnaıy avtomobıl suıyqtyqtarynyń birqatar túrleri engiziledi.

Qazirgi ýaqytta Qazaqstanda temeki ónimderi, aıaq kıim, dárilik zattar, kıik múıizderi, motor maılary, syra jáne syra sýsyndary mindetti tańbalaýǵa jatady.

Aıta keteıik, kásipkerler tańbalaý shyǵyndaryna 50% qosymsha shegerim alady.