Qazaqstanda 16 aýmaqtyq qorǵanys basqarmalary qurylady

ASTANA. QazAqparat - Qazaqstannyń 14 oblysy men Astana jáne Almaty qalalarynda 16 aýmaqtyq qorǵanys brıgadasynyń basqarmalary qurylady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

Zań jobasy qorǵanys jáne áskerı qyzmet salasyndaǵy qoǵamdyq qatynastardy retteýge, zańnamadaǵy quqyqtyq normalar arasyndaǵy qaıshylyqtardy, olqylyqtardy, kollızııalardy joıýǵa baǵyttalady.

Memlekettik qorǵanystyq tapsyrys, aýmaqtyq qorǵanys júıelerin jetildirý máseleleri de qarastyrylady.
Qorǵanys mınıstriniń orynbasary Talǵat Muhtarovtyń aıtýynsha, Memleket basshysynyń 2015 jyldyń 25 jeltoqsanyndaǵy Jarlyǵyna sáıkes, Qazaqstanda aýmaqtyq áskerler quryp, olardy qorǵanys júıesimen yqpaldastyrý kózdelgen bolatyn.

«Aýmaqtyq qorǵanys Qorǵanys Kúshteriniń quramyna enetin bolady. Al aýmaqtyq qorǵanys áskerı bólimniń jetekshileri - áskerı qyzmetshi mártebesinde, al shtab jumysshylary áskerı mindettiler bolyp tabylady. Zań jobasy aıasynda áskerı mindettilerdi arnaıy áskerı jıyndarǵa shaqyrý, áskerı qyzmetshi mártebesin berý máselesi qarastyrylyp, olarǵa qoldanystaǵy zańnamada kórsetilgen quqyqtar men mindetter belgilenedi. Sonymen qatar, oblystyq jáne Astana men Almaty qalalarynyń jergilikti atqarýshy organdary quzyretine aýmaqtyq qorǵanys bólimderin qamtamasyz etý máselesi beriledi. Osylaısha, kórsetilgen normany júzege asyrý úshin elimizdiń 14 oblysy men Astana, Almaty qalalarynda 16 aýmaqtyq qorǵanys brıgadalar basqarmalary qurylatyn bolady», - dedi mınıstr orynbasary.
Onyń sózine qaraǵanda, aýmaqtyq qorǵanys basqarmalaryn qurý boıynsha álemniń ozyq tájirıbeleri zerdelengen.