Qazaqstanda 16 aýdıtor sottaldy

NUR-SULTAN. QazAqpart – Qazaqstanda 16 aýdıtor sottaldy. Bul týraly Premer-Mınıstrdiń birinshi orynbasary-Qarjy mınıstri Álıhan Smaıylov málim etti, dep habarlaıdy QazAqparat tilshisi.

«2017-2019 jyldary 16 aýdıtor men qosalqy bólimsheniń bir qyzmetkeri ustalyp, sottaldy. Jemqorlyq kórinisiniń týyndaýyna aýdıtormen tikeleı baılanysqa shyǵý sebep boldy», - dedi Smaıylov Parlament Májilisindegi Úkimet saǵatynda.

Onyń paıymynsha, jemqorlyq táýekelderine qatysty problemalardy sheshý úshin saladaǵy protsesterdi barynsha avtomattandyrý kerek.

«Elektrondy kameralyq baqylaýdyń, apellıatsııalyq shaǵymdanýdyń damýy arqyly memlekettik aýdıtorlardyń nysandarǵa barýy azaıyp, olardyń tekseriletin adamdarmen tikeleı baılanysqa shyǵýy kúrt tómendedi. Máselen, 2015 jyly tekserýlerdiń 100 paıyzy burynǵysynsha nysanǵa barý tártibimen júrgizilgen. Búginde aýdıttiń 44 paıyzy onlaın ótkiziledi», - dedi Úkimet basshysynyń birinshi orynbasary.

Onyń atap ótýinshe, protsester barynsha avtomattandyrylǵannan keıin, tekserýlerdiń tek 20 paıyzynda ǵana nysanǵa barý qajet bolady, ıaǵnı túgendeý men sholý jasaý kerek bolǵan jaǵdaılarda.