Qazaqstanda 16 adam vaktsına saldyrsa da, koronavırýs juqtyrǵan

NUR-SULTAN. QazAqparat – QR Densaýlyq saqtaý mınıstrligi Sanıtarııalyq-epıdemıologııalyq baqylaý komıteti vaktsına saldyrsa da, koronavırýs juqtyrǵan turǵyndar týraly aqparat berdi, dep habarlaıdy QazAqparat tilshisi.

«Búgingi tańda vaktsına alǵannan keıin (birinshi jáne ekinshi kezeń) koronavırýs ınfektsııasyn juqtyrýdyń 16 jaǵdaıy tirkeldi. Bul jaǵdaılardyń ishinde vaktsınatsııanyń ekinshi kezeńinen keıingi eń kóp kún – tórtinshi apta. Sonymen qatar, koronavırýs ınfektsııasyna qarsy vaktsınatsııadan keıingi ımmýnıtet ekinshi kezeńdegi vaktsınany alǵan sátten bastap, alty aptadan keıin qalyptasatynyn habarlaımyz», - dep túsindirdi komıtet.

Sonymen birge, komıtet aýrýdyń juǵýyna vaktsınanyń qatysy joqtyǵyn basa aıtty.

«Bizdiń elde qoldanylatyn KVI-ge qarsy vaktsınanyń quramynda tiri vırýs joq, sondyqtan engizilgen vaktsına KVI aýrýyn týdyrmaıdy. Vaktsınada antıdeneler paıda bolatyn koronavırýstyń bir bóligi ǵana bar. Keıin ınfektsııa bolǵan jaǵdaıda, bul antıdeneler vaktsınadaǵy osy bólshek arqyly tabıǵı vırýsty tutas tanyp, ony joıady. Osyǵan baılanysty, jańadan ekpe alǵan adam vaktsınadan aýrý juqtyra almaıdy jáne vaktsına alǵandyqtan aınalasyna aýrý tasymaldamaıdy», - deıdi Sanıtarııalyq-epıdemıologııalyq baqylaý komıteti.