Qazaqstanda 16,3 mln adamnyń elektrondy densaýlyq pasporty bar - mınıstr
Mınıstrdiń aıtýynsha, búgingi tańda bilim berý salasynyń barlyq deńgeıi tsıfrlandyrýmen qamtylǵan. Mektepke deıin bilim beretin uıymdardyń 64 protsenti ótinishterdi elektrondyq túrde qabyldaıdy. Al mektepterdiń 94 protsenti elektrondyq kúndelikter men jýrnaldardy paıdalanady.
«Jalpy, bul baǵytty tsıfrlandyrý aýyldyq jáne qalalyq mektepter arasyndaǵy alshaqtyqty 30 protsentke tómendetýge múmkindik berdi», - dedi D.Abaev Úkimettiń búgingi otyrysynda.
Onyń sózine qaraǵanda, densaýlyq saqtaý salasyn tsıfrlandyrý aıasynda elektrondy qujat berýge medıtsınalyq uıymdardyń 99,2 protsenti aýysty. Qazaqstannyń 16,3 mıllıon turǵynynda óńirlik elektrondyq densaýlyq pasporty bar.
«Dárigerdiń qabyldaýyna barý, saǵattap kezek kútý eki esege azaıdy. Al analızderdiń qorytyndysyn alý ýaqyty 2,5 esege deıin tómendedi. 2019 jyly elektrondyq densaýlyq saqtaý pasporttarymen qamtamasyz etýdi 100 protsentke jetkizý josparlanǵan. 2018 jyly densaýlyq saqtaýdy tsıfrlandyrýdyń ekonomıkalyq tıimdiligi 37,8 mıllıard teńgege baǵalanyp otyr», - dep atap kórsetti D.Abaev.
Aıta keteıik, búgingi otyrysta QR Aqparat jáne kommýnıkatsııalar mınıstri Dáýren Abaev «Tsıfrlyq Qazaqstan» baǵdarlamasyn iske asyrý nátıjesi boıynsha esep berdi. Osy oraıda Úkimet basshysy Baqytjan Saǵyntaev tsıfrlandyrý aıasynda memlekettik organdardyń ózara baılanysyn kúsheıtip, aqparattyq tehnologııalardy qoldanýdy talap etetin normalardy tezdetip bitirýdi tapsyrdy.
