Qazaqstanda 156 myńnan astam adam jumysqa turǵyzyldy

ASTANA. 12 qarasha. QazAqparat - Aǵymdaǵy jyldyń 9 aıynda 156,1 myń adam jumysqa turǵyzyldy, bul ýákiletti organdarǵa júgingen barlyq azamattardyń 54,9 paıyzyn quraıdy, dep habarlady QR Premer-Mınıstriniń resmı saıty Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Onyń ishinde, 10,5 myń adam áleýmettik jumys oryndaryna turǵyzylsa, 6,2 myń túlek jastar tájirıbesinen ótýge jiberildi.

Almaty men Astana qalalarynyń jáne oblystardyń jumyspen qamtýdy jáne áleýmettik baǵdarlamalardy úılestirý basqarmalarynyń málimetteri boıynsha, 9 aıda jumys máselesi boıynsha olarǵa  284 myń azamat júgingen, onyń ishinde 134,9 myń adam - aýyldyq jerdiń turǵyndary.

«Aǵymdaǵy jyldyń III toqsanynda jumyssyzdyq deńgeıi 0,1 paıyz tómendep, 5,2 paıyzdy qurady. Sondaı-aq, ekonomıkalyq belsendi jáne jumyspen qamtylǵan halyqtyń sany ulǵaıdy», - delingen mınıstrliktiń habarlamasynda.

Atap aıtqanda, 2012 jyldyń III toqsanynda ekonomıkalyq belsendi halyqtyń sany, 2011 jyldyń sáıkes kezeńimen salystyrǵanda, 97,5 myń adamǵa ulǵaıdy jáne 9,013 mln. adamdy qurady, jumyspen qamtylǵan adamdardyń sany 8,54 mln. adamdy qurady nemese 1,1 paıyzǵa ósti.