Qazaqstanda 150-ge jýyq adam «A» korpýsynyń kadrlyq rezervine ótti
ASTANA. QazAqparat - Qazaqstanda 150-ge jýyq adam "A" korpýsy kadrlyq rezervine ótti. Bul týraly búgin Ortalyq kommýnıkatsııalar qyzmetinde QR Memlekettik qyzmet isteri agenttiginiń basshysy Álıhan Baımenov málim etti.
"Bıyl 1029 ótinish berilip, onyń 73 paıyzy qazirgi memlekettik qyzmette júrgen azamattar boldy jáne bir mańyzdysy onyń ishinde 44 paıyzy jergilikti atqarý organdarynda jumys jasap júrgender, 27 paıyzy memlekettik qyzmetshi bolyp tabylmaıtyn úmitkerler. Kandıdattardyń 12 paıyzdan astamy áıel adamdar boldy. Qujattardy qaraý qorytyndysy boıynsha 800-ge jýyq adam biliktilik talaptaryna saı dep tanyldy. Olardyń 746-sy testileýge qatysty. Onyń nátıjesinde 365 azamat, ıaǵnı 49 paıyzy shekti mándi ıgerip, ary qaraı kelesi áńgimelesý kezeńine jiberildi", - dep atap ótti ol.
Ulttyq komıssııanyń 27 mamyrdaǵy qorytyndy irikteýi boıynsha kadr rezervine 149 kandıdat usynyldy. Onyń ishinde 7 adam jaýapty hatshylar, apparat basshylary, 27 adam QR Prezıdenti Ákimshiliginiń sektor meńgerýshileri, bılik tarmaqty apparatynyń bólim meńgerýshileri, 38 adam komıtet tóraǵalary, aýmaqtyq departament basshylary, 65 adam qala jáne aýdan ákimderi, 12 azamat tekserý komıssııalarynyń tóraǵalary men músheleri laýazymdaryna usynylyp otyr. Osylaısha, byltyrǵy jáne bıylǵy irikteý qorytyndylary boıynsha "A" korpýsynyń 553 laýazymyna 553 adamnan turatyn kadr rezervi quryldy.
"Testileý bıyl byltyrǵydan ózgesheleý ótti. Birinshiden, Memleket basshysynyń qazan aıyndaǵy "A" korpýsy memqyzmetshilerimen kezdesýinde bergen tapsyrmalaryna sáıkes, zańnamany bilý testileri ózgertildi. Aýdandyq, qalalyq ákim deńgeıindegi laýazym úkimetkerlerine bilýi tıis zańdardyń sany 10-nan 8-ge deıin qysqartyldy. Al tekserý komıssııalarynyń múshesi bolam degen úmitkerlerge Bıýdjettik kodeks engizildi. Sondaı-aq biz bıyl alǵash ret tulǵalyq, kóshbasshylyq qasıetterin anyqtaıtyn jańa testileýdi tájirıbe júzinde synaqtan ótkizdik. Bul testileýdi jasaýǵa biz álemniń eń bedeldi kompanııalaryn tarttyq", - deıdi agenttik tóraǵasy.
