Qazaqstanda 150 balaǵa arnalǵan táýlik boıy reabılıtatsııa maýsymy bastaldy

QR Eńbek jáne halyqty áleýmettik qorǵaý mınıstrliginiń málimetinshe, jazdyń sońyna deıin elimizdiń barlyq óńirlerinen 150-den astam bala ıntensıvti reabılıtatsııadan ótedi. Baǵdarlama Áleýmettik qorǵaý salasyn damytýdyń ulttyq ǵylymı ortalyǵynyń bastamasymen júzege asyrylyp otyr.

– Táýlik boıy baqylaýdy qamtıtyn bul format ásirese shalǵaı eldi mekenderde turatyn otbasylar úshin tıimdi. Reabılıtatsııa estý qabiletin damytýǵa, aýyzsha sóıleýdi qalyptastyrýǵa jáne balalardy áleýmettik beıimdeýge baǵyttalǵan. Baǵdarlama sáýir men tamyz aralyǵynda bes kezeń boıynsha ótedi, ár kezeń 15 kúnge sozylady. Sonymen qatar ata-analarǵa arnalǵan oqytý jumystary qatar júrgiziledi, – delingen mınıstrlik habarlamasynda.

Alǵashqy kóshpeli maýsym Almaty qalasyndaǵy «Altyn-Qarǵaly» shıpajaıynda ótti. Oǵan 12 óńirden kelgen 28 bala qatysty. Balalarǵa sýrdopedagogtar, logopedter jáne psıhologtar keshendi kómek kórsetti.

– Biz Qostanaıdan keldik. Ulym buryn dybystarǵa mán bermeıtin, al qazir daýysty ajyrata bastady. Nátıjesi óte jaqsy, mamandarǵa alǵysymyz sheksiz, – dedi ata-analardyń biri.

Baǵdarlama aıasynda «Ata-analar mektebine» erekshe kóńil bólinedi. Munda mamandar úı jaǵdaıynda reabılıtatsııa júrgizýdiń tıimdi ádisterin úıretedi.

Mınıstrlik málimetinshe, reabılıtatsııalyq kýrstarǵa joldama óńirlik jumyspen qamtý jáne áleýmettik baǵdarlamalar basqarmalary arqyly beriledi. Baǵdarlama kohlearlyq ımplantatsııa jasalǵannan keıingi bes jyl ishinde balalar úshin qoljetimdi.

Aıta keteıik, elimizde jyl boıy úzdiksiz qoldaý kórsetý maqsatynda Ulttyq ǵylymı ortalyqtyń fılıaldarynda kúndizgi formatta da estý-sóıleý reabılıtatsııasy júrgiziledi.

Buǵan deıin Úkimet otyrysynda elimizde logoped, sýrdolog, reabılıtolog mamandary tapshy ekeni kóterildi.