Qazaqstanda 15 shógindi alapqa geologııalyq barlaý júrgizý kerek - Maǵzum Myrzaǵalıev
Qazaqstannyń Ekologııa, geologııa jáne tabıǵı resýrstar mınıstrligi elimizdiń geologııalyq barlaý salasyna iri sheteldik ınvestorlar tartý jónindegi marketıngtik strategııany, sondaı-aq road-show ázirleýdi josparlap otyr. Bul týraly vedomstvo basshysy Maǵzum Myrzaǵalıev óziniń Twitter paraqshasynda habarlady.
Mınıstrdiń aıtýynsha, búginde Qazaqstanda jalpy óndirilgen kómirsýtek resýrsy 76,4 mlrd tonna munaı ekvıvalentine teń keledi. Zertteýdi qajet etetin 15 shógindi alap bar.
«Elimizdiń geologııalyq barlaý salasyndaǵy strategııalyq mindetiniń biri - jańa ken oryndaryn ashýda mańyzy zor ınvestıtsııa tartý», - dep jazdy dúısenbide M.Myrzaǵalıev.
«Elimizdiń geologııalyq barlaý salasyna iri shetel ınvestorlaryn tartý, negizgi álemdik núktelerde elimizdiń ınvestıtsııalyq, geologııalyq áleýetin kórsetý maqsatymen road-show uıymdastyrý boıynsha táýelsiz saraptama jasaýdaǵy jáne tıimdi strategııa daıyndaýdaǵy kóshbasshy - IHS Markit kompanııasymen marketıngtik strategııa ázirleý máselesin talqyladyq», - dedi mınıstr.
Mınıstrdiń sózine qaraǵanda, ınvestıtsııa tartý zamanaýı tehnologııalar arqyly keshendi geologııalyq barlaý jumysyn júrgizýge múmkindik beredi.
«Bul asa tereń basseınderdiń barlyq aýmaǵyndaǵy geologııalyq qurylymnyń dál keskinin berip qana qoımaı, óz áleýetimizdi barynsha baǵamdaýǵa, jańa ken oryndary men jańa keleshektiń kiltin ashýǵa, jumys oryndaryn qurýǵa múmkindik beredi», - dep atap ótti mınıstr.
