Qazaqstanda 15 mln. astam ga nemese 95,8% dándi daqyl jınaldy - AShM

ASTANA. 16 qazan. QazAqparat - Qazaqstanda ústimizdegi jyldyń 16 qazanyna aýyl sharýashylyq taýarlaryn óndirýshiler 15 mln. ga astam dándi daqyldardy jınady, ol elimizdiń jınaý alqaptarynyń 95,8% quraıdy, dep Aýyl sharýashylyǵy mınıstrligine silteme jasap, primeminister.kz saıtynan habarlady.

«Respýblıkanyń barlyq óńirlerinde jańa astyqty jınaý naýqany júrgizilýde. Aýyl sharýashylyǵynyń oblys basqarmalarynyń málimetteri boıynsha ústimizdegi jyldyń 16 qazanyna aýylsharýashylyq taýarlaryn óndirýshiler 15079,6 myń ga jınaǵan, bul oblystardyń jınaý alqaptarynyń 95,8 % quraıdy», - delingen málimdemede.

Budan ózge, jedel aqparat boıynsha búgingi tańda 20 mln. astam tonna astyq tartylǵan, sondaı-aq ortasha túsimdilik bir gektardan 13,3 tsentnerdi qurady. 2012 jyly túsimdilik bir gektardan 8,4 tsentner quraǵanyn aıta ketken jón.

Sondaı-aq, astyq jınaý Jambyl, Batys Qazaqstan, Qyzylorda, Qostanaı jáne Shyǵys Qazaqstan oblystarynda tolyǵymen aıaqtalǵan.