Qazaqstanda 1,5 myń shaqyrym temirjol jóndeldi

ASTANA. KAZINFORM — Qazaqstanda bıyl jóndeýge josparlanǵan 1 577 shaqyrym temirjoldyń 1 506 shaqyrymy jańartyldy. Qazir Astana – Almaty, Ózenki – Qandyaǵash jáne basqa da baǵyttarda jumys jalǵasyp jatyr. Al 2027 jyldan bastap Tobyl – Qartaly ýchaskesin jóndeý josparlanǵan.

Qazaqstanda 1,5 myń shaqyrym temirjol jóndeldi
Foto: Kólik mınıstrligi

Aǵymdaǵy jyly Semeı – Aıagóz jáne Maqat – Beıneý – Mańǵystaý ýchaskelerinde temirjol joldaryna kúrdeli jóndeý jumystary aıaqtaldy. Sonymen qatar Ózenki – Qandyaǵash, Astana – Almaty, Astana – Tobyl, Kókshetaý – Qostanaı, Arys – Sheńgeldi jáne basqa dabaǵyttarda jumystar jalǵasyp jatyr.

Qazaqstanda 1,5 myń shaqyrym temirjol jóndeldi
Foto: Kólik mınıstrligi

2027 jyldan bastap Tobyl – Qartaly temirjol ýchaskesin kezeń-kezeńimen saýyqtyrý jumystary josparlanyp otyr.

Jumystar Memleket basshysynyń tapsyrmalaryn oryndaý aıasynda kólik salasyn damytý baǵdarlamasy sheńberinde júrgiziledi. Baǵdarlama temirjol ınfraqurylymyn kezeń-kezeńimen jańartýdy, temirjol jelisiniń senimdiligi men tıimdiligin arttyrýdy kózdeıdi.

Jalpy, 2023–2029 jyldar aralyǵynda elimizde 11 myń shaqyrym temirjol jolyn jóndeý josparlanǵan. Baǵdarlamany iske asyrýdyń alǵashqy úsh jylynda, ıaǵnı 2023–2025 jyldary josparlanǵan 4 353 shaqyrymnyń ornyna 4 448 shaqyrym temirjol joly jańartyldy. Osylaısha, josparly kórsetkish 95 shaqyrymǵa asyra oryndaldy.

Qazaqstanda 1,5 myń shaqyrym temirjol jóndeldi
Foto: Kólik mınıstrligi

Baǵdarlama aıasynda Beıneý – Mańǵystaý jáne Pavlodar – Semeı ýchaskelerindegi jumystar aıaqtaldy. Sonymen qatar Kókpekti – Qaraǵaıly, Atasý – Qarajal, Jambyl – Jańatas jáne Qarabulaq – Tekeli az júktemeli ýchaskelerinde 83 shaqyrym temirjol jolyn saýyqtyrý jumystary júrgizildi.

Júrgizilip jatqan jumystar temirjol jelisiniń tehnıkalyq jaǵdaıyn jaqsartýǵa oń áserin tıgizýde. Atap aıtqanda, jalpy uzyndyǵy 2,9 myń shaqyrymdy quraıtyn ýchaskelerde jolaýshylar poıyzdarynyń qozǵalys jyldamdyǵy artty. Júrgizilgen jóndeý jumystarynyń nátıjesinde tıisti ýchaskelerdegi temirjol joldarynyń jaı-kúıi«jaqsy» jáne «óte jaqsy» dep baǵalanýda.

Temirjol ınfraqurylymyn júıeli túrde jańartý jeliniń senimdiligi men ótkizý qabiletin arttyrýǵa, júk jáne jolaýshylar poıyzdarynyń qozǵalys jaǵdaılaryn jaqsartýǵa, sondaı-aq Qazaqstannyń kólik-logıstıkalyq áleýetin odan ári damytý úshin qosymsha múmkindikter jasaýǵa múmkindik beredi.