Qazaqstanda 15 medıtsınalyq mekeme ISQua halyqaralyq akkredıtatsııasynan ótedi - QR DSM
ASTANA. 26 naýryz. QazAqparat - Aǵymdaǵy jyly eldegi 15 medıtsınalyq mekeme ISQua halyqaralyq akkredıtatsııasynan ótedi.
Bul týraly búgin Astanada ótip jatqan respýblıkalyq semınar barysynda QR Densaýlyq saqtaý mınıstrligi Medıtsınalyq jáne farmatsevtıkalyq qyzmetti baqylaý komıteti attestattaý, akkredıtteý jáne lıtsenzııalaý basqarmasynyń bastyǵy Gúlnár Alpysbekova málim etti.
Onyń aıtýynsha, halyqaralyq talaptardyń negizinde jasaqtalǵan jańartylǵan akkredıtatsııany ilki rejimde Shymkent, Astana, Almaty, Kókshetaý, Aqtóbe, Qaraǵandy, Pavlodar, Qostanaı qalalarynyń statsıonarlyq, ambýlatorlyq jáne jedel medıtsınalyq kómek kórsetý mekemeleri , sondaı-aq qan bankileri men qan quıý qyzmetteri alatyn bolady.
«Búgingi respýblıkalyq semınar barysynda halyqaralyq konsýltanttar akkredıtteýdiń jańartylǵan standarttaryn synaqtan ótkizý boıynsha 160 jattyqtyrýshyǵa oqytý kýrsyn ótkizedi. Jalpy bıyl 740 dáriger oqytylmaq. Keıin oqýdan ótken qazaqstandyq jattyqtyrýshylar densaýlyq saqtaý uıymdarynyń sapasy boıynsha menedjer men sarapshyny daıyndaıtyn bolady», - deıdi G. Alpysbekova.
Atalmysh jańartylǵan standarttardy engizý jumystary «QR Densaýlyq saqtaý sektorynda tehnologııalardy berý jáne ınstıtýtsıonaldyq reformany júrgizý» Dúnıejúzilik bank jobasy aıasynda qarjylandyrylyp otyr.
Jańartylǵan standarttar ulttyq akkredıtteý standarttary men densaýlyq saqtaý salasyndaǵy sapa boıynsha halyqaralyq qoǵamnyń usynymdary eskerile otyryp ázirlendi.
