Qazaqstanda 14,8 mln gektar jer memleket menshigine qaıtaryldy
ASTANA.KAZINFORM - Sońǵy tórt jyl ishinde Qazaqstanda buryn paıdalanylmaǵan nemese zań buzýshylyqpen berilgen 14,8 mln gektar jer memleket menshigine qaıtaryldy. Bul týraly Aýyl sharýashylyǵy mınıstrligi Jer resýrstaryn basqarý komıtetiniń tóraǵasy, jerdi paıdalaný men qorǵaý jónindegi bas memlekettik ınspektor, «Jer amanaty» partııalyq komıssııasy tóraǵasynyń birinshi orynbasary Murat Temirjanov málimdedi.
Bul jumys Memleket basshysy Qasym-Jomart Toqaevtyń tapsyrmasyna sáıkes atqarylyp otyr.
Keshendi sharalar Komıtet pen onyń aýmaqtyq bólimsheleriniń, sondaı-aq múddeli memlekettik organdardyń, sonyń ishinde quqyq qorǵaý qurylymdarynyń jáne «AMANAT» partııasynyń «Jer amanaty» jobasy komıssııasy músheleriniń belsendi qatysýymen qolǵa alynyp keledi.
– 14,8 mln gektar jerdiń 10,8 mln gektary qaıta bólindi, onyń ishinde 6,7 mln gektary konkýrs negizinde berildi, al 4,1 mln gektary ortaq paıdalaný jerleri retinde bekitildi. Budan bólek, buryn paıdalanylmaǵan 5,2 mln gektar jer tıisti sharalar qabyldanǵannan keıin sharýashylyq aınalymǵa berildi, – dep atap ótti Murat Temirjanov.
Jalpy jer resýrstaryn utymdy paıdalaný barysyna júrgizilgen baqylaý sheńberinde 7 100-den astam tekserý júrgizilip, nátıjesinde anyqtalǵan buzýshylyqtardy joıý boıynsha 5 300-den astam nusqama berildi.
Aýyl sharýashylyǵy mınıstrligi málimetinshe, qolǵa alynǵan jumystar jer resýrstaryn tıimdi paıdalanýdy arttyrýǵa, olardy bólýdiń ashyqtyǵyn qamtamasyz etýge jáne ekonomıkalyq aınalymǵa tartýǵa baǵyttalǵan.
Aıta keteıik, Almaty prokýratýrasy Іle Alataýynyń taý bókterindegi jer telimin memleketke qaıtardy.
