Qazaqstanda 14,5 myńnan astam shetel azamaty jumys isteıdi
1 qazandaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 14 534 shetel azamaty eńbek etedi, dep habarlaıdy Kazinform.
Eńbek jáne halyqty áleýmettik qorǵaý mınıstrliginiń málimetinshe, shetel jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 515 ruqsat (birinshi sanat), qurylymdyq bólimshelerdiń basshylary úshin 2 717 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 6 332 jáne 680 adam. Sondaı-aq maýsymdyq jumystarǵa 1 897 adam, al korporatıvtik aýystyrý aıasynda 2 393 adam tartyldy.
Qazirgi ýaqytta Qazaqstanda ShJK paıdalanatyn 1 529 jumys berýshi bar. Olarda 471,7 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96,9%-y.
"Ekonomıkalyq qyzmet túrleri boıynsha eń kóp jumys isteıtinder qurylys salasynda – 4 887 adam (34,5%), aýyl, orman jáne balyq sharýashylyǵy – 1 637 adam (11,5%), taý – ken ónerkásibi jáne karerlerdi qazý – 1 360 adam (9,6%), óńdeý ónerkásibi – 1 219 adam (8,3%), kásibı, ǵylymı jáne tehnıkalyq qyzmet – 896 adam (6,3%).
Eńbek mıgranttary keletin negizgi elder: Qytaı – 3 944 adam (27,8%), Ózbekstan – 1 714 adam (12,1%), Úndistan – 1 326 adam (9,3%), Túrkııa – 1 288 adam (9,1%)", - dep jazdy vedomstvodan.
Іshki eńbek naryǵyn qorǵaý maqsatynda Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. 2023 jyly jalpy kvota respýblıkadaǵy jumys kúshiniń sanyna qatysty 0,24% nemese 22 260 birlik mólsherinde belgilendi.
