Qazaqstanda 142 aýyldyń sý ınfraqurylymy jańarady
ASTANA. KAZINFORM – Bıyl Qazaqstanda 142 aýyldy qamtıtyn 12 aýyzsý jobasyn aıaqtaý josparlanyp otyr. Nátıjesinde shamamen 540 myń turǵynnyń sýmen jabdyqtaý jaǵdaıy jaqsarady. Sý resýrstary jáne ırrıgatsııa vıtse-mınıstri Jandos Sálimov qaı óńirlerde sý nysandary salynatynyn baıandady.
Vıtse-mınıstrdiń aıtýynsha, elimizdiń birqatar óńirinde jańa sý qoımalary salynyp, qoldanystaǵy ırrıgatsııalyq júıeler qalpyna keltirilip jatyr.
Túrkistan oblysynda jalpy syıymdylyǵy 69,1 mln tekshe metr bolatyn «Báıdibek ata» jáne «Qaraqýys» sý qoımalary salynyp jatyr. Qurylys-montajdaý jumystaryn bıyl aıaqtaý kózdelgen.
– Sondaı-aq, Jambyl, Batys Qazaqstan, Qyzylorda oblystarynda taǵy úsh sý qoımasyn salý úshin merdiger uıymdar anyqtalyp jatyr. Taǵy 12 gıdrotehnıkalyq qurylysty qaıta jańǵyrtý jáne úsh sý nysanyn sanatsııalaý jobasy iske asyrylýda, – deıdi spıker.
Irrıgatsııalyq jelilerdi jańartý jumystary da birneshe óńirdi qamtıdy. Qazir Jambyl, Túrkistan, Qyzylorda, Batys Qazaqstan, Almaty jáne Jetisý oblystarynda jalpy uzyndyǵy 979 shaqyrym bolatyn 96 kanal qaıta jańǵyrtylyp jatyr.
Al Túrkistan oblysyndaǵy Kóksaraı kontrrettegishin rekonstrýktsııalaý úshin merdiger uıym izdestirilýde. Taǵy segiz sý qoımasyn jańǵyrtýǵa daıyndyq bastalǵan.
Jambyl, Túrkistan jáne Aqtóbe oblystarynda 64 joba júzege asyrylyp jatyr. Onyń 46-sy boıynsha jumys tolyq aıaqtalǵan. Jobalar aıasynda jalpy uzyndyǵy 717 shaqyrym kanal jańǵyrtylýy tıis. Búginge deıin onyń 486,9 shaqyrymy qalpyna keltirildi. Jyl sońyna deıin taǵy 73,9 shaqyrym kanalǵa qatysty bes jobany aıaqtaý josparlanǵan. Qalǵan 13 joba 2027-2028 jyldary iske asyrylady.
Al Túrkistan men Jetisý oblystaryndaǵy segiz joba aıasynda 210 shaqyrym ırrıgatsııalyq kanaldyń betondaý jumystary tolyq aıaqtaldy. Qazir gıdrotehnıkalyq qurylystar ornatylyp jatyr. Sonymen birge 512 tik drenaj uńǵymasyn burǵylaý jumysy túgel aıaqtaldy. Olardy jyl sońyna deıin paıdalanýǵa berý josparlanǵan.
Aıta keteıik, Qazaqstanda 2030 jylǵa deıin 42 jańa sý qoımasy salynady. Sondaı-aq 37 sý qoımasy men 110 gıdrotehnıkalyq qurylys qaıta jańǵyrtylyp, 14,5 myń shaqyrym kanal jóndeledi.
