Qazaqstanda 140 sot-medıtsına sarapshysy jetispeıdi
ASTANA. KAZINFORM — Qazaqstanda 140-tan astam sot-medıtsına sarapshysy jetispeıdi. Bul týraly Ádilet mınıstri Azamat Esqaraev Senat depýtattarymen kezdesý barysynda málimdedi.
Mınıstrdiń sózinshe, qazirgi tańda sot sarapshysynyń mártebesin kóterý máselesi ózekti bolyp tur.
«Quqyq qorǵaý organdary tarapynan sot saraptamasy qyzmetine suranystyń joǵary bolýyna qaramastan kadr tapshylyǵy anyq baıqalady. Oǵan eńbekaqynyń tómendigi, júktemesi aýyr jumys kestesi jáne áleýmettik kepildikterdiń joqtyǵy sebep», — dedi mınıstr.
Ádilet mınıstrliginiń dereginshe, sot saraptama ortalyǵynda 1076 sarapshy jumys isteıdi. Alaıda saraptama kólemi jyl sanap artyp otyr.
Máselen 2023 jyly sot saraptamasynyń 57 túri boıynsha 408 924 saraptama jasalǵan.
Bul — orta eseppen aıyna bir sarapshyǵa 34 saraptama qorytyndysyn jasaýǵa týra keledi degen sóz.
Aıta keteıik sot sarapshylary men sot-medıtsına sarapshylarynyń jalaqysyn kóterý úshin jyl saıyn 1,158 mlrd teńge qarajat qajet.
Sonymen qatar depýtattarǵa elimizderi máıithana ǵımarattarynyń tozǵany baıandaldy.
Instıtýt ǵımarattary (sot saraptamalarynyń ǵylymı-praktıkalyq ortalyǵyn qospaǵanda) tehnıkalyq turǵydan jaramsyz, moraldyq turǵydan eskirgen jáne sanıtarııalyq-epıdemıologııalyq talaptarǵa, sondaı-aq sot saraptamasyn júrgizý úshin arnaıy jaraqtandyrylǵan ǵımarattarǵa qoıylatyn standarttar men talaptarǵa (aýdan normasy, ınsolıatsııa, dybys oqshaýlaý, jeldetý deńgeıi) sáıkes kelmeıdi.
«Aýmaqtyq bólimshelerdiń búkil ǵımarattarynda atys jáne gaz qarýyna, jarylǵysh qurylǵy men jarylǵysh zattarǵa, ónerkásiptik jabdyqtar men kólik quraldarynyń bólshekterine, órt pen jarylystan qalǵan qaldyqtarǵa eksperımenttik zertteý júrgizý úshin arnaıy jabdyqtalǵan úı-jaı joq», -dedi Sot saraptamalary ortalyǵy dırektorynyń mindetin atqarýshy Rýslan Satyvaldeev.
Óz kezeginde senatorlar bul máseleni nazarǵa alyp, Úkimet basshysyna depýtattyq saýal joldap, qajet bolsa zańnamaǵa ózgeris engizýge ázir ekenin aıtty.
