Qazaqstanda 140 mln. dollarǵa 3 kolonııa salynady - J.Asanov
ASTANA. QazAqparat - Aldaǵy ýaqytta Qazaqstanda 140 mln. dollarǵa 3 kolonııa salynady. Bul týraly búgin elordada ótip jatqan «Ortalyq Azııadaǵy jańa qylmystyq-atqarý zańnamasyn qalyptastyrý: úrdister men talaptar» atty aımaqtyq konferentsııada QR Bas prokýrorynyń orynbasary Jaqyp Asanov málim etti.
J.Asanovtyń sózine qaraǵanda, sottalýshylarǵa halyqaralyq standarttarǵa saı jaǵdaı jasaý barynsha qıyn. Degenmen Qazaqstan bul baǵytta alǵa jyljyp keledi. Máselen, qylmystyq atqarý júıesin jańǵyrtý boıynsha arnaıy baǵdarlama qabyldanǵan.
«Bul baǵdarlamany júzege asyrý úshin 140 mln. AQSh dollary bólindi. Bul qarajatqa taıaý jyldary 4,5 myń orynǵa arnalǵan 3 jańa kolonııa salynatyn bolady», - dedi ol.
Sondaı-aq Bas prokýrordyń orynbasarynyń atap ótýinshe, osydan eki aı buryn Qyzylorda qalasynda 900 orynǵa arnalǵan jańa kolonııa ashylǵan. Al bıyl 1000 sottalýshyǵa arnalǵan túrme Oral qalasynda ashylatyn bolady.
«ıAǵnı, biz bul baǵytta elimizdiń qarjylyq múmkinshilikterine oraı jumys isteýdemiz», - dedi J.Asanov.
